مەملەكەت باسشىسى قاسىم-جومارت توقاەۆ ەلىمىزگە رەسمي ساپارى اياقتالعان فرانتسيا پرەزيدەنتى ەممانيۋەل ماكروندى اۋەجايدان قۇرمەتتەپ شىعارىپ سالدى. بۇل تۋرالى اقوردانىڭ ءباسپاسوز قىزمەتى جاريالادى، دەپ حابارلايدى “ادىرنا” ۇلتتىق پورتالى.
اۋەجايعا بارماس بۇرىن ەكى ەل پرەزيدەنتتەرى «ەتنواۋىل» كورمەسىن تاماشالادى. فرانتسيا پرەزيدەنتىنىڭ قازاقستانعا رەسمي ساپارىنا وراي قازاق حالقىنىڭ باي مادەني مۇراسىمەن تانىستىراتىن «ەتنواۋىل» ارنايى كورمەسى ۇيىمداستىرىلدى.
مەملەكەتتەر باسشىلارى باستاعان دەلەگاتسيانى كورمە الاڭىندا جاس كورەرمەندەر تەاترىنىڭ ارتىستەرى مەن «قورقىت» ەتنو-فولكلورلىق ءانسامبلى ءان شاشۋمەن قارسى الدى.
فرانتسيادان كەلگەن جوعارى مارتەبەلى مەيماندار جەمىس-جيدەكپەن بەزەندىرىلگەن «كوك بازاردى»، قولونەر بۇيىمدارىن جانە قازاق سۋرەتشىلەرىنىڭ كارتينالارىن، سونداي-اق وتاندىق ديزاينەرلەر ازىرلەگەن ۇلتتىق ءسان ۇلگىلەرىنىڭ دەفيلەسىن تاماشالادى.
سونىمەن قاتار شەتەلدىك قوناقتارعا ۇلتتىق مۋزەي قورىنداعى ەكسپوناتتاردان («التىن ادام»، «بەرەل جىلقىسى»، «سارمات كوسەمى»، «قىپشاق جاۋىنگەرى» ت.ب) جاساقتالعان «ۇلى دالا التىنى» ەكسپوزيتسياسى، ىقىلاس دۇكەنۇلى اتىنداعى مۇراجايداعى ۇلتتىق مۋزىكالىق اسپاپتار تانىستىرىلدى.
ەتنواۋىل اۋماعىندا قاسىم-جومارت توقاەۆ پەن ەممانيۋەل ماكرونعا بالۋاندارىمىز قازاق كۇرەسىنىڭ ءادىس-تاسىلدەرىن، جاس جەتكىنشەكتەر اسىق ويىنىن، ال ساياتشىلار مەن قۇسبەگىلەر تازى يتتەرى مەن قىران قۇستارىن كورسەتىپ، حالقىمىزدىڭ اڭشىلىق ءداستۇرى تۋرالى اڭگىمەلەپ بەردى.
«ەتنواۋىلدى» ارالاۋ بارىسىندا قوناقتارعا «قازاق كۇرەسى» ۇلتتىق كۇرەسىنەن جانە «اسىق اتۋ» ويىنىنان كورسەتىلىم قويىلىمدارى ۇيىمداستىرىلدى. سونىمەن قاتار، تازى يتتەرى مەن جىرتقىش قۇستاردىڭ مۇمكىندىكتەرى كورسەتىلدى.
كورمەدەن كەيىن توقاەۆ ماكروندى اۋەجايدان شىعارىپ سالدى.
قازاقستان ساپارىنان كەيىن ماكرون وزبەكستانعا بارعان. ول وزبەكستان رەسپۋبليكاسىنىڭ پرەزيدەنتى شاۆكات ميرزيەەۆپەن بىرگە سامارقاند تۇنىمەن سەرۋەندەپ قايتقان.
ەكى ەل باسشىلارى يۋنەسكو-نىڭ بۇكىلالەمدىك مۇرالار تىزىمىنە ەنگەن رەگيستان ساۋلەت ءانسامبلىن ارالادى.
ەستەرىڭىزگە سالا كەتەيىك، ەممانيۋەل ماكرون ساۋدا-ەكونوميكالىق، ينۆەستيتسيالىق جانە ەنەرگەتيكالىق ىنتىماقتاستىقتى نىعايتۋ بويىنشا كەلىسسوزدەر جۇرگىزىپ، حالىقارالىق جانە ايماقتىق كۇن تارتىبىندەگى ماسەلەلەردى تالقىلاۋعا قازاقستانعا رەسمي ساپارمەن كەلگەن بولاتىن. ونى ەلوردا اۋەجايىندا قر پرەمەر-ءمينيسترى ءاليحان سمايىلوۆ قارسى العان ەدى.
