9 جەلتوقساندا اتىراۋدا «قازمۇنايگاز» ۇك اق (قمگ) باستاماسىمەن تۇڭعىش وتاندىق QazPolymers-2022 فورۋمى باستالدى. جيىن ەلىمىزدە وندىرىلەتىن پوليمەر شيكىزاتىنان پوليمەر ونىمدەر شىعارۋ نارىعىن دامىتۋ ماسەلەسىن تالقىلاۋعا ارنالعان باستى الاڭعا اينالدى.
باسقوسۋعا عىلىم، دامۋ ينستيتۋتتارى، سالاداعى بيزنەس قاۋىمداستىق وكىلدەرى، مەديتسينالىق تەحنيكا، قۇرىلىس، وراۋ ماتەريالدارىن، پلاستيكالىق قۇبىرلار وندىرۋشىلەر، سونداي-اق مۇناي وڭدەۋ، مۇناي حيمياسى مەن باسقا دا وتاندىق جانە شەتەلدىك كومپانيالاردىڭ وكىلدەرى جينالدى. ولار، ەڭ الدىمەن، قازاقستان ەكونوميكاسىنداعى تۇڭعىش گاز-حيميا كەشەنى — پوليپروپيلەن وندىرەتىن «Kazakhstan Petrochemical Industries Inc» (KPI) جشس زاۋىتىن ارالاپ، كەشەننىڭ جۇمىسىمەن تانىستى.
ەسكە سالساق، KPI زاۋىتىن (قمگ-ءنىڭ ۇلەسى بار) 2022 جىلى 8 قاراشادا مەملەكەت باسشىسى قاسىم-جومارت توقاەۆ اتىراۋ وبلىسىنا ساپارى كەزىندە ىسكە قوستى. 2023 جىلى كاسىپورىن جىلىنا 500 مىڭ توننا ءونىم ءوندىرىپ، تولىق وندىرىستىك قۋاتىن ورىنداعاندا پوليپروپيلەن ءوندىرىسى بويىنشا الەمدىك نارىقتاعى ەڭ ءىرى ويىنشىلارمەن ءبىر قاتارعا شىعادى.
نۇرلان بالعىمباەۆ اتىنداعى كوممۋنيكاتسيالاردى دامىتۋ ورتالىعىندا وتكەن فورۋمعا اتىراۋ وبلىسىنىڭ اكىمى سەرىك شاپكەنوۆ، «قازمۇنايگاز» ۇك اق باسقارما توراعاسى ماعزۇم مىرزاعاليەۆ، سونداي-اق اتىراۋ مۇناي جانە گاز ۋنيۆەرسيتەتىنىڭ رەكتورى، پروفەسسور گۇلزادا شاكۋليكوۆا قاتىستى.
قمگ باسشىسى ءوز سوزىندە قازاقستاننىڭ گەوگرافيالىق ورنىن جانە كومىرسۋتەكتەردى قولدانا وتىرىپ، جوعارى تەحنولوگيالىق ونىمدەر جاساۋ مۇمكىندىگىن ۇتىمدى پايدالانۋ كەرەگىن اتاپ ءوتتى.
«بۇگىنگى تاڭدا پوليمەر ونەركاسىبى — الەمدىك ەكونوميكانىڭ ەڭ جىلدام دامىپ كەلە جاتقان سەگمەنتتەرىنىڭ ءبىرى. سالانىڭ الەۋەتى جوعارى. ءبىز قازاقستاننىڭ ۇتىمدى تۇستارىن، ياعني ءتيىمدى گەوگرافيالىق ورنىمىزدى، كومىرسۋتەك رەسۋرستارى بازاسىندا جوعارى تەحنولوگيالىق ونىمدەردى دامىتۋ بويىنشا كەڭ مۇمكىندىكتەرىمىزدى ونەركاسىپ، تاماق، تۇرمىستىق، مەديتسينالىق جانە باسقا دا سالالاردا قۇنى جوعارى تۇپكىلىكتى ءونىم شىعارۋ ءۇشىن ءتيىمدى پايدالانا ءبىلۋىمىز كەرەك»، — دەدى م.مىرزاعاليەۆ.
«قازمۇنايگاز» باسشىسى ۇلتتىق مۇناي-گاز كومپانياسى وتاندىق بيزنەستىڭ جوعارىدا اتالعان الەۋەتى جوعارى سالانى دامىتۋداعى ۇلكەن ءرولى مەن مۇمكىندىكتەرىن كورىپ وتىرعانىن جانە وعان بارلىق مۇمكىن قولداۋدى كورسەتۋگە دايىن ەكەنىن ايتتى.
فورۋم بارىسىندا ەكى پانەلدىك سەسسيا ۇيىمداستىرىلدى: «مۇناي-گاز حيمياسى — ۇلتتىق ەكونوميكانى ءارتاراپتاندىرۋدىڭ جاڭا درايۆەرى» جانە «قازاقستاندىق پوليپروپيلەن — تۇپكىلىكتى ءونىم وندىرەتىن وتاندىق بيزنەستى دامىتۋ مۇمكىندىكتەرى». قاتىسۋشىلار سونداي-اق وتاندىق مۇناي-گاز حيمياسى سالاسىنىڭ دامۋ كەزەڭدەرى تۋرالى اقپارات الدى (جىلدىق قۋاتى 1,2 ملن توننا پوليەتيلەن زاۋىتىن سالۋ بويىنشا جۇمىستار باستالدى، قۋاتى جىلىنا 180 مىڭ تونناعا دەيىن بۋتاديەن كاۋچۋكتەرىن سينتەزدەۋ بويىنشا بۋتاديەن ءوندىرىسىن قۇرۋ جوسپاردا). كۇن تارتىبىندە پوليمەر يمپورتىنا تاۋەلدىلىكتى تومەندەتۋ ءۇشىن بيزنەس بايلانىستاردى ارتتىرۋ جانە باستاپقى جاعدايدى قالىپتاستىرۋ مىندەتتەرى، مەملەكەتتىك قولداۋ شارالارى مەن وتاندىق پوليمەر شيكىزاتىنا ىشكى سۇرانىستى ىنتالاندىرۋ ماسەلەلەرى تۇر. قازاقستاندىق شيكىزاتتى پايدالانا وتىرىپ، حالىق تۇتىناتىن تاۋارلار ءتۇرىن كەڭەيتۋ جونىندەگى بيزنەس جوبالارعا شاعىن جانە ورتا بيزنەستى تارتۋ ماسەلەسى دە تالقىلاندى. سونداي-اق، كومپانيالارعا تابىستى بيزنەس كەيستەر تانىستىرىلادى.
فورۋمدى ۇيىمداستىرۋشىلار قاتارىندا «قازمۇنايگاز» ۇك اق، مۇناي-گاز حيمياسى ونىمدەرىن وندىرۋشىلەر مەن تۇتىنۋشىلار قاۋىمداستىعى (مۇناي-گاز حيمياسى قاۋىمداستىعى), «اتامەكەن» ۇكپ جانە اتىراۋ قالاسىنداعى KPI زاۋىتى بار.
انىقتاما ءۇشىن:
قازاقستاندا پوليپروپيلەن مەن پوليەتيلەن يمپورتىنىڭ كولەمى ءوسىپ كەلەدى. بۇل كورسەتكىش 2021 جىلى 221 مىڭ توننا بولدى، 2016 جىلمەن سالىستىرعاندا ەكى ەسەگە ارتىق (123 مىڭ توننا). رەسمي ستاتيستيكاعا سايكەس، ەلىمىزدە يمپورتالاتىن پوليمەر شيكىزاتىمەن جۇمىس ىستەپ، تۇپكىلىكتى ءونىم شىعاراتىن 130-عا جۋىق شاعىن جانە ورتا كاسىپورىندار بار. پوليمەر شيكىزاتىنىڭ نەگىزگى تۇتىنۋشىلارى نەگىزىنەن — پلاستماسسا جانە رەزەڭكەدەن تەحنيكالىق بۇيىمدار وندىرەتىن كاسىپورىندار.
پوليپروپيلەن — ماشينا جاساۋ، مەديتسينا، ەلەكتر تەحنيكاسى، وراۋ ماتەريالدارى، ىدىستار، تالشىقتار، قۇبىرلار، كەڭسە جابدىقتارى، باقشا جانە كەڭسە جيھازدارى وندىرىسىندە، سونداي-اق قۇرىلىس، توقىما جانە تاماق ونەركاسىبىندە قولدانىلاتىن نەگىزگى شيكىزات.
