«ArselorMıttal Temirtaý» kompanııasyna 5,8 mlrd teńge aıyppul salyndy . Bul týraly búgin OKQ-da ótken brıfıngte Ekologııalyq retteý jáne baqylaý komıtetiniń tóraǵasy Zulfuhar Joldasov málimdedi, dep habarlaıdy “Adyrna” ulttyq portaly.
«ArselorMıttal Temirtaý» metallýrgııalyq kesheni – Temirtaý qalasyndaǵy atmosferalyq aýany lastaýshy negizgi kásiporyn. Onyń aýany lastaýdaǵy úlesi – 86,4 paıyz. Jyl saıyn «ArselorMıttal Temirtaý» kásipornyna ekologııalyq baqylaý júrgiziledi. Bıylǵy 9 aıda aýmaqtyq ekologııa departamenti kompanııaǵa 7 josparly jáne jospardan tys tekserý júrgizdi. Onyń nátıjesi boıynsha ekologııalyq zańnamanyń buzylýy faktileri anyqtaldy, - dedi komıtet tóraǵasy.
Onyń aıtýynsha, kásiporyn beıorganıkalyq shań-tozańdardy normatıvten tys shyǵarǵan, buryn berilgen nusqamalardy oryndamaǵan jáne gaz shyǵatyn qurylǵylardy ustaý boıynsha tıimdi sharalar qabyldamaǵan.
Al kásiporyn basshylyǵy bul sheshimmen kelispeı, qarsy shaǵym túsirgen. Zulfuhar Joldasov qazir istiń sotta qaralyp jatqanyn atap ótti.
