QR Májilisiniń depýtaty Erlan Saırov Mońǵolııadaǵy bolǵan saıası bulǵaqqa qatysty pikir bildirdi. Ol Qazaqstan bıligindegiler men olıgarhtardyń "Qasiretti Qańtar" men Mońǵolııadaǵy sherýdi esten esh shyǵarmaýy tıis ekendigin aıtty. Qazaqtyń joǵalǵan, urlanǵan qazynasyn qaıtarýǵa shaqyrdy. Bul jaıly "Adyrna" ulttyq portaly habarlaıdy.
- Mońǵolııadaǵy jaǵdaı bizge sabaq bolýy kerek. Ózimizdiń "Qasiretti Qańtar" sabaqtary da árqashan este bolýy basty aspekt. Iaǵnı, memleket pen halyqtyń muń-múddesine qarsy shyǵyp, halyqtyń ıgilikterinen kúneltkisi keletin, sheshim qabyldaý tetikterine jaqyn júrip, óziniń qulqynyn toltyratyn toptar bılik aınalasynan tazartylýy tıis. Olıgarhııa men memleket "toptasyp" ketkende qandaı da bolmasyn elde moraldyq qundylyqtar joıyla bastaıdy. Óıtkeni, shyndyq pen ádilettilik jumys istemeı qalady.
"Balyq basynan shirıtindigi" tárizdi, bizdiń sheshim qabyldaý tetikterin, ıaǵnı mınıstrlikterdi olıgarhtardyń "áser etýinen" tazartý qajet.
Óıtkeni ádilettilik bolmasa, eldiń berekesi qashady.
Sonymen birge, Ekibastuzda maınıng fırmalaryn qaptatyp mıllıardtaǵan paıda taýyp, halyqty "qan qaqsatyp" qoıǵan toptar anyqtalyp, jazalanýy tıis. Qurylyp jatqan komıssııalardyń negizgi jumysy olıgarhtardyń halyq esebinen tapqan paıdalaryn anyqtap, elge qaıtarý, tehnogendi apatqa shynaıy kiálilerdi anyqtaý. Halyq pen azamattardyń "joǵalǵan paıdasy" anyqtalyp, eselep bıýdjetke qaıtarylýy kerek. Bul másele boıynsha halyqtyń, jurtshylyqtyń úni naq estilýi tıis, - dedi depýtat.
"Adyrna" ulttyq portaly
