“اق جول” دەموكراتيالىق پارتياسىنىڭ دەپۋتاتى ايگۇل جۇماباەۆا «ۇكىمەت ساعاتىندا» الەۋمەتتىك كودەكس جوباسىن تالقىلادى، دەپ حابارلايدى «ادىرنا» ءتىلشىسى.
ايتۋىنشا، كودەكس جوباسىندا پرەزيدەنتتىڭ باعدارلاماسىن ىسكە اسىرۋ بويىنشا بىرقاتار نوۆەللا كوزدەلگەن. ولاردىڭ بارلىعى وزەكتى، حالىقپەن كەزدەسۋلەر وسىنى كورسەتتى.
«كودەكستەگى ماڭىزدى باعىتتىڭ ءبىرى – ىشكى كوشى-قوندى ىنتالاندىرۋ، ازاماتتاردىڭ سولتۇستىك، ورتالىق وڭىرلەرگە قونىس اۋدارۋىن رەتكە كەلتىرۋ. ءاربىر قابىلداۋشى ءوڭىر قونىس اۋدارۋدى ىنتالاندىرۋ ءۇشىن ءوز جول كارتاسىن ازىرلەيتىن بولادى.
وسىعان وراي، كەلەسىگە نازار اۋدارعىم كەلەدى. ماسەلەن، جازدا سايلاۋشىلارمەن كەزدەسۋ كەزىندە «ەڭبەك» (وڭتۇستىك-سولتۇستىك) باعدارلاماسىنىڭ كەيبىر كەمشىلىكتەرى انىقتالدى. 5 جىل ىشىندە قونىس اۋدارۋعا 2 ملرد. تەڭگە جۇمسالعان.
الايدا، وسى باعدارلاما بويىنشا كەلگەن ازاماتتاردىڭ كوبىسى قايتىپ ورالۋدا، ال قالعاندارىنىڭ-دا جاعدايلارى ءماز ەمەس.
سولتۇستىك قازاقستان وبلىسى تۇرعىندارىنىڭ ءوتىنىشى بويىنشا، ءبىز / مال وسىرۋگە، ەگىن ەگۋگە جاعدايى بار اۋىلداردى ارالادىق.
بىراق بۇل اۋىلدار مەملەكەتتىك ورگانداردىڭ ولشەمدەرى بويىنشا بولاشاعى جوق اۋىلدار تىزىمىنە كىرگەن.
اۋىلدارعا بۇگىن ادام كەرەك، ويتكەنى اۋىلدارداعى جالعىز جۇمىس بەرۋشى مەكەمە - مەكتەپتەر جابىلىپ قالۋى مۇمكىن. بۇل شاعىن اۋىلداردا دايىن تۇرعان قورا جاي مەن تۇرمىسقا ىڭعايلى دايىن ۇيلەر دە بار، جەرگىلىكتى تۇرعىندار ولاردى جوندەپ، مالمەن، جەم-شوپپەن كومەكتەسۋگە دايىن. «اقجولدىق» كاسىپكەرلەر دە سول بوس ۇيلەرگە جوندەۋ جۇمىستارىن جۇرگىزۋگە ءازىر. وسى اۋىلدارعا وڭتۇستىك ازاماتتارى جانە قانداستار قونىس اۋدارعىپ مال ۇستاپ، بوس جەرلەردى پايدالانعىسى كەلەدى. بىراق بۇل جەرگە كەلگەن ازاماتتار ءتيىستى مەملەكەتتىك قولداۋدى الا المايدى، ويتكەنى ول اۋىلدار پەرسپەكتيۆاسى جوق دەپ سانالادى.
ال وڭتۇستىك وڭىرلەردەن وتباسىلار جاپپاي قونىستانعان تىرەك اۋىلداردا مال ۇستاۋعا جاعداي جوق، بوس جاتقان جەر دە جوق، ونى وزدەرىڭىز بۇگىنگى كوپتەگەن جەر داۋلارىنان بىلەسىزدەر.
جايىلىم جەر دە جوق، جۇمىس تا جوق، بىراق، ولارعا سول تىرەك اۋىلداردا ءۇي سالىنۋدا. ۇيلەردىڭ ساپاسى سىن كوتەرمەيدى. ۋچاسكەلەرىندە مال قوراسىنا ورىن جوق. قانشاما بيۋدجەتتىك اقشا ىسىراپ بولىپ جاتىر»،—دەدى ول.
دەپۋتات پرەزيدەنتتىڭ الداعى 5 جىلدا اۋىلدى دامىتۋعا ارنالعان جوسپارىنا ەرەكشە توقتالدى.
«ەڭبەك» باعدارلاماسىن «قۋاتتى وڭىرلەر» جوباسى الماستىرادى. كەلەسى جىلدىڭ 31 ناۋرىزىنا دەيىن اۋىلدىق اۋماقتاردى دامىتۋ تۇجىرىمداماسى قابىلدانادى.
وسىعان بايلانىستى، قونىس اۋدارۋدى ىنتالاندىرۋ تۋرالى جاڭا جوبالاردا قابىلداۋشى وڭىرلەردەگى اۋىلداردى دامىتۋ پەرسپەكتيۆاسىنىڭ ولشەمدەرىن قايتا قاراۋ قاجەت. جالپى ادام قونىستاندىرۋعا كەدەرگى بولىپ وتىرعان، شالعاي اۋىلدارعا قاتىستى بولاشاعى جوق دەگەن تۇسىنىكتى، كريتەريدى اينالىمنان مۇلدە الىپ تاستاۋ كەرەك.
سونىمەن قاتار، مال شارۋاشىلىعىنا قولايلى اۋىلداردى ساقتاۋ ءۇشىن ورتالىق جانە سولتۇستىك وڭىرلەرگە قونىس اۋدارۋشىلاردى قابىلداۋ كۆوتالارىن بىرنەشە ەسە ارتتىرۋ كەرەك دەپ سانايمىز»،—دەپ تۇيىندەدى ول.
