“Aq jol” demokratııalyq partııasynyń depýtaty Aıgúl Jumabaeva «Úkimet saǵatynda» Áleýmettik Kodeks jobasyn talqylady, dep habarlaıdy «Adyrna» tilshisi.
Aıtýynsha, Kodeks jobasynda Prezıdenttiń baǵdarlamasyn iske asyrý boıynsha birqatar novella kózdelgen. Olardyń barlyǵy ózekti, halyqpen kezdesýler osyny kórsetti.
«Kodekstegi mańyzdy baǵyttyń biri – ishki kóshi-qondy yntalandyrý, azamattardyń soltústik, ortalyq óńirlerge qonys aýdarýyn retke keltirý. Árbir qabyldaýshy óńir qonys aýdarýdy yntalandyrý úshin óz jol kartasyn ázirleıtin bolady.
Osyǵan oraı, kelesige nazar aýdarǵym keledi. Máselen, jazda saılaýshylarmen kezdesý kezinde «Eńbek» (Ońtústik-Soltústik) baǵdarlamasynyń keıbir kemshilikteri anyqtaldy. 5 jyl ishinde qonys aýdarýǵa 2 mlrd. teńge jumsalǵan.
Alaıda, osy baǵdarlama boıynsha kelgen azamattardyń kóbisi qaıtyp oralýda, al qalǵandarynyń-da jaǵdaılary máz emes.
Soltústik Qazaqstan oblysy turǵyndarynyń ótinishi boıynsha, biz / mal ósirýge, egin egýge jaǵdaıy bar aýyldardy araladyq.
Biraq bul aýyldar memlekettik organdardyń ólshemderi boıynsha bolashaǵy joq aýyldar tizimine kirgen.
Aýyldarǵa búgin adam kerek, óıtkeni aýyldardaǵy jalǵyz jumys berýshi mekeme - mektepter jabylyp qalýy múmkin. Bul shaǵyn aýyldarda daıyn turǵan qora jaı men turmysqa yńǵaıly daıyn úıler de bar, jergilikti turǵyndar olardy jóndep, malmen, jem-shóppen kómektesýge daıyn. «Aqjoldyq» kásipkerler de sol bos úılerge jóndeý jumystaryn júrgizýge ázir. Osy aýyldarǵa ońtústik azamattary jáne qandastar qonys aýdarǵyp mal ustap, bos jerlerdi paıdalanǵysy keledi. Biraq bul jerge kelgen azamattar tıisti memlekettik qoldaýdy ala almaıdy, óıtkeni ol aýyldar perspektıvasy joq dep sanalady.
Al ońtústik óńirlerden otbasylar jappaı qonystanǵan tirek aýyldarda mal ustaýǵa jaǵdaı joq, bos jatqan jer de joq, ony ózderińiz búgingi kóptegen jer daýlarynan bilesizder.
Jaıylym jer de joq, jumys ta joq, biraq, olarǵa sol tirek aýyldarda úı salynýda. Úılerdiń sapasy syn kótermeıdi. Ýchaskelerinde mal qorasyna oryn joq. Qanshama bıýdjettik aqsha ysyrap bolyp jatyr»,—dedi ol.
Depýtat Prezıdenttiń aldaǵy 5 jylda aýyldy damytýǵa arnalǵan josparyna erekshe toqtaldy.
«Eńbek» baǵdarlamasyn «Qýatty óńirler» jobasy almastyrady. Kelesi jyldyń 31 naýryzyna deıin Aýyldyq aýmaqtardy damytý tujyrymdamasy qabyldanady.
Osyǵan baılanysty, qonys aýdarýdy yntalandyrý týraly jańa jobalarda qabyldaýshy óńirlerdegi aýyldardy damytý perspektıvasynyń ólshemderin qaıta qaraý qajet. Jalpy adam qonystandyrýǵa kedergi bolyp otyrǵan, shalǵaı aýyldarǵa qatysty bolashaǵy joq degen túsinikti, krıterıdi aınalymnan múlde alyp tastaý kerek.
Sonymen qatar, mal sharýashylyǵyna qolaıly aýyldardy saqtaý úshin ortalyq jáne soltústik óńirlerge qonys aýdarýshylardy qabyldaý kvotalaryn birneshe ese arttyrý kerek dep sanaımyz»,—dep túıindedi ol.
