اباي اۋدانىندا «ستاندارت» يندۋستريالدى ايماعى اشىلادى

887
Adyrna.kz Telegram

شىمكەنت قالاسىنداعى اباي اۋدانىندا ورنالاسقان بۇرىنعى قورعاسىن زاۋىتىنىڭ ورنىندا شاعىن جانە ورتا بيزنەسكە ارنالعان «ستاندارت» يندۋستريالدى ايماعى اشىلادى.

بۇل تۋرالى بۇگىن شىمكەنت قالاسى اكىمدىگىنىڭ جانىنداعى اقپاراتتىق-كوممۋنيكاتسيالار ورتالىعىندا مەملەكەت باسشىسى قاسىم-جومارت توقاەۆتىڭ قازاقستان حالقىنا ارناعان «ادىلەتتى مەملەكەت. ءبىرتۇتاس ۇلت. بەرەكەلى قوعام» اتتى جولداۋى اياسىندا اتقارىلىپ جاتقان جۇمىستار جونىندە ءباسپاسوز بريفينگىن وتكىزگەن اباي اۋدانىنىڭ اكىمى بۇقارباي پارمانوۆ مالىمدەدى.
–مەملەكەت باسشىسى جولداۋدا 2025 جىلعا قاراي وڭدەۋ ونەركاسىبىنىڭ ەكسپورتىن 1,5 ەسەگە كوبەيتۋدى تاپسىردى. وسىعان وراي «ستاندارت» جەكە يندۋستريالدى ايماعى سالىنۋدا. مۇندا شاعىن جانە ورتا بيزنەس سۋبەكتىلەرى شوعىرلانادى. اۋماعى 118 گەكتاردى قۇرايتىن جەكە يندۋستريالىق ايماقتا 176 مىڭ شارشى مەتر دايىن وندىرىستىك الاڭدار، ونىڭ ىشىندە 64 مىڭ شارشى مەتر قويما الاڭدارىن سالۋ جوسپارلانعان. جالپى قۇنى 30 ميلليارد تەڭگەنى قۇرايتىن ينۆەستيتسيالىق جوبا اياقتالعان كەزدە 3 مىڭ ادامعا جاڭا جۇمىس ورنى اشىلادى، – دەدى ب.پارمانوۆ.
بۇقارباي رىسقۇلۇلى بريفينگ بارىسىندا اۋدانداعى ينفراقۇرىلىم جەلىلەرىن دامىتۋ ماسەلەلەرىنە دە توقتالىپ ءوتتى. اتاپ ايتقاندا، اۋدان اۋماعى بويىنشا 34 ەلدى مەكەننىڭ 33-ءى ساپالى اۋىز سۋمەن قامتىلعانىن اتاپ ءوتتى. ونىڭ ايتۋىنشا، 2020 جىلى اۋىز سۋعا 1,9 ملرد. تەڭگە ءبولىنىپ، قىزىلجار، يگىلىك، جاڭاتالاپ، نۇرشۋاق، باتىس، تاۋەلسىزدىككە 20 جىل، ىنتىماق-2, اقتاس-2 ەلدى مەكەندەرى اۋىز سۋ جۇيەسىنىڭ قۇرىلىسى جۇرگىزىلگەن. ال، 2021 جىلى 6,9 ملرد. تەڭگە قارالىپ، 9 ەلدى مەكەنگە اۋىز سۋ بەرىلىپتى.
سونىمەن قاتار 2022 جىلى بۇل ماقساتقا 5,2 ملرد. تەڭگە ءبولىنىپ، قۇرساي ەلدى مەكەنىندە ورتالىقتاندىرىلعان اۋىز سۋ جۇيەسىنىڭ قۇرىلىس جۇمىستارى جۇرگىزىلۋدە. اتالعان جۇمىستار 2022 جىلدىڭ سوڭىندا اياقتالىپ، ەلدى مەكەن ساپالى اۋىز سۋمەن قامتىلاتىن بولادى.
–اباي اۋدانىنىڭ 8 ەلدى مەكەنى ورتالىقتاندىرىلعان كارىز جۇيەسىمەن قامتىلعان. بۇل ەلدى مەكەندەردە 116 مىڭعا جۋىق ادام نەمەسە اۋدان حالقىنىڭ 36 پايىزى ءومىر سۇرەدى. 2020-2022 جىلدارى ارالىعىندا 1 نىساننىڭ جوبالىق-سمەتالىق قۇجاتتارى ازىرلەنىپ، 3 ەلدى مەكەندە كارىز جۇيەسىنىڭ قۇرىلىس جۇمىستارى اياقتالدى. قالعان ەلدى مەكەندەردى قامتۋ ماقساتىندا 2022-2025 جىلدارى ارالىعىندا اباي اۋدانى اۋماعىندا 2 كارىز تازالاۋ يماراتى (كوس) سالىنۋ جوسپارلانۋدا. ناتيجەسىندە، 2025 جىلعا دەيىن اباي اۋدانى 59 پايىزى ورتالىقتاندىرىلعان كارىز جۇيەسىمەن قامتىلادى دەپ كۇتىلۋدە، – دەدى اۋدان اكىمى.
ب.پارمانوۆتىڭ ايتۋىنشا، اۋدان اۋماعى بويىنشا 34 ەلدى مەكەننىڭ 31 ەلدى مەكەنى مەملەكەتتىك ەلەكتر جارىعىمەن قامتىلىپ وتىر. قالعان 3 ەلدى مەكەن جەكە مەنشىك ترانفورماتورلاردى پايدالانادى. 2021 جىلى 5 ەلدى مەكەندى (ىنتىماق-2, ايكول، يگىلىك، تاۋەلسىزدىككە 20 جىل، اقجار) ەلەكتر جارىعىمەن قامتۋ ءۇشىن جالپى 7,2 ملرد. تەڭگەگە جوبا جاسىلىپ، اعىمداعى جىلى 5,2 ملرد تەڭگە بولىنگەن. بيىل 3 ەلدى مەكەننىڭ (نۇرشۋاق، باتىس، جاڭاتالاپ) قۇرىلىس اياقتالىپ، ساپالى ەلەكتر جارىعىمەن قامتىلىپ، اۋدان اۋماعى 100 پايىز ەلەكتر جارىعىمەن قامتىلاتىن بولادى.

پىكىرلەر