Shymkent qalasyndaǵy Abaı aýdanynda ornalasqan burynǵy Qorǵasyn zaýytynyń ornynda shaǵyn jáne orta bızneske arnalǵan «Standart» ındýstrıaldy aımaǵy ashylady.
Bul týraly búgin Shymkent qalasy ákimdiginiń janyndaǵy aqparattyq-kommýnıkaııalar ortalyǵynda Memleket basshysy Qasym-Jomart Toqaevtyń Qazaqstan halqyna arnaǵan «ÁDILETTI MEMLEKET. BIRTUTAS ULT. BEREKELI QOǴAM» atty Joldaýy aıasynda atqarylyp jatqan jumystar jóninde baspasóz brıfıngin ótkizgen Abaı aýdanynyń ákimi Buqarbaı Parmanov málimdedi.
–Memleket basshysy Joldaýda 2025 jylǵa qaraı óńdeý ónerkásibiniń eksportyn 1,5 esege kóbeıtýdi tapsyrdy. Osyǵan oraı «Standart» jeke ındýstrıaldy aımaǵy salynýda. Munda shaǵyn jáne orta bıznes sýbektileri shoǵyrlanady. Aýmaǵy 118 gektardy quraıtyn jeke ındýstrııalyq aımaqta 176 myń sharshy metr daıyn óndiristik alańdar, onyń ishinde 64 myń sharshy metr qoıma alańdaryn salý josparlanǵan. Jalpy quny 30 mıllıard teńgeni quraıtyn ınvestıııalyq joba aıaqtalǵan kezde 3 myń adamǵa jańa jumys orny ashylady, – dedi B.Parmanov.
Buqarbaı Rysqululy brıfıng barysynda aýdandaǵy ınfraqurylym jelilerin damytý máselelerine de toqtalyp ótti. Atap aıtqanda, aýdan aýmaǵy boıynsha 34 eldi mekenniń 33-i sapaly aýyz sýmen qamtylǵanyn atap ótti. Onyń aıtýynsha, 2020 jyly aýyz sýǵa 1,9 mlrd. teńge bólinip, Qyzyljar, Igilik, Jańatalap, Nurshýaq, Batys, Táýelsizdikke 20 jyl, Yntymaq-2, Aqtas-2 eldi mekenderi aýyz sý júıesiniń qurylysy júrgizilgen. Al, 2021 jyly 6,9 mlrd. teńge qaralyp, 9 eldi mekenge aýyz sý berilipti.
Sonymen qatar 2022 jyly bul maqsatqa 5,2 mlrd. teńge bólinip, Qursaı eldi mekeninde ortalyqtandyrylǵan aýyz sý júıesiniń qurylys jumystary júrgizilýde. Atalǵan jumystar 2022 jyldyń sońynda aıaqtalyp, eldi meken sapaly aýyz sýmen qamtylatyn bolady.
–Abaı aýdanynyń 8 eldi mekeni ortalyqtandyrylǵan káriz júıesimen qamtylǵan. Bul eldi mekenderde 116 myńǵa jýyq adam nemese aýdan halqynyń 36 paıyzy ómir súredi. 2020-2022 jyldary aralyǵynda 1 nysannyń jobalyq-smetalyq qujattary ázirlenip, 3 eldi mekende káriz júıesiniń qurylys jumystary aıaqtaldy. Qalǵan eldi mekenderdi qamtý maqsatynda 2022-2025 jyldary aralyǵynda Abaı aýdany aýmaǵynda 2 káriz tazalaý ımaraty (KOS) salyný josparlanýda. Nátıjesinde, 2025 jylǵa deıin Abaı aýdany 59 paıyzy ortalyqtandyrylǵan káriz júıesimen qamtylady dep kútilýde, – dedi aýdan ákimi.
B.Parmanovtyń aıtýynsha, aýdan aýmaǵy boıynsha 34 eldi mekenniń 31 eldi mekeni memlekettik elektr jaryǵymen qamtylyp otyr. Qalǵan 3 eldi meken jeke menshik tranformatorlardy paıdalanady. 2021 jyly 5 eldi mekendi (Yntymaq-2, Aıkól, Igilik, Táýelsizdikke 20 jyl, Aqjar) elektr jaryǵymen qamtý úshin jalpy 7,2 mlrd. teńgege joba jasylyp, aǵymdaǵy jyly 5,2 mlrd teńge bólingen. Bıyl 3 eldi mekenniń (Nurshýaq, Batys, Jańatalap) qurylys aıaqtalyp, sapaly elektr jaryǵymen qamtylyp, aýdan aýmaǵy 100 paıyz elektr jaryǵymen qamtylatyn bolady.
