شىمكەنت قالاسىنىڭ تاتار-باشقۇرت ەتنومادەني بىرلەستىگى رەسپۋبليكا كۇنىنە وراي «چاك-چاك بايرامى» مەرەكەسىن اتاپ ءوتتى. تاتار ۇلتىنىڭ ەڭ ءتاتتى مەرەكەسى اتالىپ كەتكەن جيىنعا تاتار-باشقۇرت، وزبەك، كورەي جانە وزگە ەتنومادەني بىرلەستىكتەردىڭ وكىلدەرى قاتىستى.
تاتار شىعارماشىلىق ۇجىمىنىڭ ورىنداۋىندا حالىق اندەرى شىرقالىپ، چاك-چاك مەرەكەسىنىڭ باستى تاعامىنان كورمە جاساقتالىپ، ادەت-عۇرىپتارى كورسەتىلدى. مەرەكەلىك باسقوسۋدا قالالىق «قوعامدىق كەلىسىم» كمم باسشىسى ەربول بايقوناقوۆ جيىلعان قاۋىمدى رەسپۋبليكا كۇنىمەن قۇتتىقتاپ، ەلدىڭ ىشكى بەيبىتشىلىگىن ساقتاۋعا ۇلەس قوسىپ وتىرعان ەتنومادەني بىرلەستىكتەرگە العىسىن جەتكىزدى.
–كۇنى كەشە 25 قازان – رەسپۋبليكا كۇنىن تويلادىق. سىزدەردى ۇلتتىق مەرەكەمەن شىن جۇرەكتەن قۇتتىقتايمىن. بۇگىندە شىمكەنت قالاسىندا 10 مىڭنان استام تاتار-باشقۇرت ەتنوسىنىڭ وكىلى بار. سانى جاعىنان قالاداعى ءىرى 5 ەتنوستىڭ قۇرامىنا كىرەدى. ءوز بولاشاعىن قازاقستانمەن بايلانىستىرعان تاتار-باشقۇرت ەتنومادەني بىرلەستىگى قوعامدىق كەلىسىمدى ساقتاۋ ساياساتىن ىسكە اسىرۋعا سۇبەلى ۇلەس قوسىپ كەلەدى. ال، بۇگىنگى تاتار ۇلتىنىڭ ءتاتتى مەرەكەسى اتالاتىن «چاق-چاك بايرامى» قالامىزدا جىل سايىن ۇيىمداستىرىلادى. داستارحاننان ەرەكشە ورىن الاتىن بۇل تاعامدى ۇلەستىرۋ ارقىلى ەتنومادەني بىرلەستىك وزدەرىنىڭ دوستىق قارىم-قاتىناسى مەن ىستىق ىقىلاسىن بىلدىرەدى. بۇگىنگى مەرەكە سونىڭ ءبىر ايعاعى، - دەدى ەربول سۇلەيمەنۇلى.
شىمكەنت قالاسىنىڭ قوعامدىق-ساياسي دامۋىنا ۇلەس قوسىپ جۇرگەن تاتار-باشقۇرت ەتنومادەني بىرلەستىگىنىڭ بىرقاتار بەلسەندى مۇشەسىنە قالا اكىمى مەن ىشكى ساياسات جانە جاستار ىستەرى جونىندەگى باسقارماسى جانە «قوعامدىق كەلىسىم» كمم تاراپىنان العىس حاتتار تابىستالدى.
ودان كەيىن، شىعارماشىلىق ۇجىمدار ازىرلەگەن كونتسەرتتىك باعدارلاما ۇسىنىلىپ، تاتار ۇلتىنىڭ تاريحى جونىندە دەرەكتى فيلم كورسەتىلدى.
