Shymkent qalasynyń tatar-bashqurt etnomádenı birlestigi Respýblıka kúnine oraı «Chak-chak baıramy» merekesin atap ótti. Tatar ultynyń eń tátti merekesi atalyp ketken jıynǵa tatar-bashqurt, ózbek, koreı jáne ózge etnomádenı birlestikterdiń ókilderi qatysty.
Tatar shyǵarmashylyq ujymynyń oryndaýynda halyq ánderi shyrqalyp, chak-chak merekesiniń basty taǵamynan kórme jasaqtalyp, ádet-ǵuryptary kórsetildi. Merekelik basqosýda qalalyq «Qoǵamdyq kelisim» KMM basshysy Erbol Baıqonaqov jıylǵan qaýymdy Respýblıka kúnimen quttyqtap, eldiń ishki beıbitshiligin saqtaýǵa úles qosyp otyrǵan etnomádenı birlestikterge alǵysyn jetkizdi.
–Kúni keshe 25 qazan – Respýblıka kúnin toıladyq. Sizderdi Ulttyq merekemen shyn júrekten quttyqtaımyn. Búginde Shymkent qalasynda 10 myńnan astam tatar-bashqurt etnosynyń ókili bar. Sany jaǵynan qaladaǵy iri 5 etnostyń quramyna kiredi. Óz bolashaǵyn Qazaqstanmen baılanystyrǵan tatar-bashqurt etnomádenı birlestigi qoǵamdyq kelisimdi saqtaý saıasatyn iske asyrýǵa súbeli úles qosyp keledi. Al, búgingi tatar ultynyń tátti merekesi atalatyn «Chaq-chak baıramy» qalamyzda jyl saıyn uıymdastyrylady. Dastarhannan erekshe oryn alatyn bul taǵamdy úlestirý arqyly etnomádenı birlestik ózderiniń dostyq qarym-qatynasy men ystyq yqylasyn bildiredi. Búgingi mereke sonyń bir aıǵaǵy, - dedi Erbol Súleımenuly.
Shymkent qalasynyń qoǵamdyq-saıası damýyna úles qosyp júrgen tatar-bashqurt etnomádenı birlestiginiń birqatar belsendi múshesine qala ákimi men ishki saıasat jáne jastar isteri jónindegi basqarmasy jáne «Qoǵamdyq kelisim» KMM tarapynan alǵys hattar tabystaldy.
Odan keıin, shyǵarmashylyq ujymdar ázirlegen konerttik baǵdarlama usynylyp, tatar ultynyń tarıhy jóninde derekti fılm kórsetildi.
