ءۇشىنشى مەگاپوليستىڭ “بوزارىق-2” شاعىن اۋدانىندا 800 ورىندىق ۋنيۆەرسيتەتتىك كوپبەيىندى اۋرۋحانا مەن اۋىسىمىنا 700 ادام قابىلدايتىن كلينيكالىق-دياگنوستيكالىق ورتالىقتىڭ قۇرىلىسى باستالدى.
رەسمي اشىلۋعا قالا اكىمى م.ايتەنوۆ، دەنساۋلىق ساقتاۋ جانە كاسىپكەرلىك باسقارماسىنىڭ باسشىلارى، «ساۋتس-ويل» كومپانياسىنىڭ پرەزيدەنتى س.سەيىتجانوۆ، “China Machinery Engeneering Corporation” ديرەكتورى حۋ دجانحۋ، ۋنيۆەرسيتەت رەكتورلارى، پروفەسسورلار، قوعام بەلسەندىلەرى مەن باق وكىلدەرى قاتىستى.
جوبا ارنايى مەملەكەتتىك باعدارلاما اياسىندا شىمكەنت قالاسىنىڭ دەنساۋلىق ساقتاۋ ينفراقۇرىلىمىن دامىتۋدىڭ 2026 جىلعا دەيىنگى وڭىرلىك پەرسپەكتيۆالىق جوسپارىنا سايكەس ىسكە اسىرىلۋدا.
نىساندار جەكە ينۆەستور-“وڭتۇستىك”قارجى ساۋدا-ونەركاسىپتىك كورپوراتسياسى» حولدينگى ەسەبىنەن قارجىلاندىرىلۋدا، ناتيجەسىندە قالادا جاڭادان 2500-نان استام جۇمىس ورىنى اشىلماق.
شارانىڭ سالتاناتتى اشىلۋىنا قاتىسقان شاھار باسشىسى:
- پرەزيدەنتىمىز جولداۋىندا باسىمدىق بەرگەندەي، ەل ەكونوميكاسى مەن حالىقتىڭ دەنساۋلىعى اراسىندا تىكەلەي بايلانىس بار ەكەنى بەلگىلى. ەكونوميكالىق دامۋدىڭ الەمدىك تاجىريبەسى كورسەتىپ وتىرعانداي، دەنى ساۋ ۇلت ءتيىمدى ەكونوميكانى قالىپتاستىرادى. ۇلت ساۋلىعى ءوندىرىس رەسۋرسى، كەز كەلگەن قوعامدىق جۇيەنىڭ باستى بايلىعى بولىپ تابىلادى. وسى ورايدا، قالامىزدا جاڭا زاماناۋي اۋرۋحانا سالۋ حالىققا مەديتسينالىق كومەكتىڭ ساپاسىن ارتتىراتىندىعىنا، توسەك-ورىن تاپشىلىعىن قىسقارتۋدى قامتاماسىز ەتىپ، قالامىزدىڭ تۇرعىندارىنا جوعارى تەحنولوگيالىق مەديتسينالىق قىزمەتتەردى الۋعا مۇمكىندىك بەرەتىندىگىنە سەنىمدىمىن،-دەي كەلە زاماناۋي نىسان سالۋعا مۇرىندىق بولعان «وڭتۇستىك» قارجى ساۋدا-ونەركاسىپتىك كورپوراتسياسى» حولدينگىنىڭ، وڭتۇستىك قازاقستان مەديتسينا اكادەمياسىنىڭ كومانداسىنا جانە جەكە س.سەيتجانۇلىنا بەلسەندى ازاماتتىق ۇستانىمى مەن شاھاردىڭ دەنساۋلىق ساقتاۋ سالاسىن دامىتۋعا قوسقان ەرەكشە ۇلەسى ءۇشىن العىس ءبىلدىردى.
ال «ساۋتس-ويل» كومپانياسىنىڭ پرەزيدەنتى س.سەيىتجانوۆ مەگاپوليستى كوركەيتۋ، دامىتۋدا جولىندا ايانباي ەڭبەك ەتۋگە دايىن ەكەندىكتەرىن جەتكىزدى. “شىم شاھاردىڭ گۇلدەنىپ، تۇرلەنۋىنە ءاربىرىمىز ۇلەس قوسقانىمىز ءجون. ويتكەنى شىمكەنت - ءبىزدىڭ ورتاق ءۇيىمىز. ال ۇلت ساۋلىعى قازاقستان بولاشاعى ءۇشىن وتە ماڭىزدى، دەنى ساۋ ۇلت قانا وتانىن دامىتا الادى”-دەدى ول.
قالا اكىمدىگى تاراپىنان بۇل باستاماعا جان-جاقتى قولداۋ كورسەتىلۋدە.
قازىرگى تاڭدا جوبانى ىسكە اسىرۋ ءۇشىن بوزارىق-2 شاعىن اۋدانىندا ورنالاسقان جالپى اۋدانى 150 گا ارنايى اۋرۋحانا قۇرىلىسى ءۇشىن بولىنگەن جەر ۋچاسكەسىنە قاجەتتى ينفراقۇرىلىم جۇيەلەرى اتاپ ايتقاندا، ەلەكتر، گاز، سۋ، كارىز جۇيەسى، تەلەفونيا جەتكىزىلدى. الداعى ۋاقىتتا قۇرىلىس كەزەڭىندە قاجەتتى جولدار مەن جول ينفراقۇرىلىمىنىڭ قۇرىلىسى قامتاماسىز ەتىلەدى.
