قاراعاندى ەكى كۇن بولدى دۇرلىگىپ تۇر. قالاداعى قۇقىق قورعاۋ ورگاندارىندا دا مازا جوق. كەنشىلەر شاھارىنداعى «درەۆني ريم» مەيرامحاناسىندا جاڭا جىلدى قارسى الماققا جينالعان 6 قازاق جىگىتىنە 30 شاقتى ارميان ۇلتىنىڭ وكىلدەرى جابىلىپ كەتىپتى. بۇل مەيرامحانانىڭ يەسى ارميان. 6 جىگىتتىڭ ۇشەۋىن پىشاقتاپ، ءتورتىنشى جىگىت سول جەردە قايتىس بولادى. قايتىس بولعان 23 جاستاعى جىگىت جانسەيىت راحىمجان باحىتجانۇلى . كىسى ولتىرگەندەر سول جەردە ءىزىن سۋىتىپ، قازىر ولاردى ىزدەستىرۋ ۇستىندە. بۇنى ەستىگەن جەرگىلىكتى قازاقتار كوتەرىلىپ، قالا ۇرەي قۇشاعىندا. پوليتسيا قىزمەتكەرلەرى مەن جەرگىلىكتى باسقارۋ ورگاندارىنىڭ كۇشىمەن اشۋلى جۇرتتى ارەڭ ۇستاپ تۇرسا كەرەك. سەبەبى، توبەلەسكە قاتىسقان، ادام ولتىرگەندەر جازادان سىتىلىپ كەتە مە دەگەن كوپشىلىك، كىنالىلەردىڭ قاتاڭ جازالانۋىن تالاپ ەتۋدە. قاراعاندىداعى ەڭ ءىرى اۆتوبازا مەن اۆتوپارك، كوپتەگەن رەستوراندار ارميانداردىكى. سولار اقشانىڭ كۇشىمەن سۋدان تازا، سۇتتەن اق بولىپ شىقسا دا تاڭ قالمايمىز دەگەن قاراعاندىلىقتار، ءازىر باسىلار ەمەس. بۇل توبەلەس ءىشىپ العان ەكى توپتىڭ توبەلەسى ەمەس. ويتكەنى، كەزىندە جەر اۋىپ كەلىپ، قازاق حالقىنان پانا تاۋىپ، نانىن جەپ، سۋىن ءىشىپ جانى امان قالعاندار قازىر جەرگىلىكتى ۇلتقا كوز الارتۋعا كوشكەن. كوز الارتقاندى قويىپ ەندى جۇدىرىق جۇمساي باستادى. كەشە عانا بوساعاڭنان ەنگەن كەلىمسەكتەر شاڭىراققا قاراۋدى قويدى. قازاق ەلىندە 130 ۇلت ەمەس; ۇلت وكىلدەرى تۇراتىنىن سولارعا دۇرىس تۇسىندىرمەگەن بيلىك كىنالى. سوندىقتان، جاۋىردى جابا توقىماي تەز ارادا بۇل ماسەلەنى شەشپەسە، جاعداي ۋشىعا بەرمەك.
وڭعار قابدەن
«ادىرنا» ۇلتتىق پورتالى
