مىڭعا جۋىق ماسەلەنىڭ جارتىسى شەشىمىن تاپقان

502
Adyrna.kz Telegram

قازاقستان رەسپۋبليكاسى پرەزيدەنتىنىڭ جارلىعىنا سايكەس، قالا اكىمى م.ايتەنوۆتىڭ كەزەكتى، ءار توقسان سايىنعى حالىقپەن ەسەپتى كەزدەسۋى اباي اۋدانى تۇرعىندارىمەن جالعاستى.

شاhار باسشىسى 9 ايدىڭ قورىتىندىسى بويىنشا بايانداما جاساپ، 50-دەن اسا سۇراقتارعا جاۋاپ بەردى.

كەزدەسۋگە 400-گە جۋىق تۇرعىنمەن قاتار، قوعامدىق كەڭەس مۇشەلەرى، ءماسليحات دەپۋتاتتارى مەن باق وكىلدەرى قاتىستى. اتالعان جيىن شىمكەنت قالاسى اكىمدىگىنىڭ ينستاگرامداعى رەسمي پاراقشاسىندا تىكەلەي ەفيردە كورسەتىلدى.
شاhار باسشىسىنىڭ جىل باسىنان باستاپ مەگاپوليستەگى ەلدىمەكەندەردى ارالاۋ بارىسىندا 125 كەزدەسۋ وتكىزىلىپ، 1020 ماسەلە كوتەرىلگەن. ءاربىرى جەكە حاتتاماعا ەنگىزىلىپ، ورىندالۋى ءجىتى باقىلاۋعا الىنعان. ناتيجەسىندە بۇگىنگە دەيىن 488 ماسەلە شەشىلگەن، 377-ءسى جىل سوڭىنا دەيىن شەشىمىن تاباتىن بولسا، ال 195 ماسەلە 2023-2025 جىلدار جوسپارىنا ەنگىزىلگەن.

ودان بولەك، اي سايىن اۋدان بەلسەندىلەرىمەن اكىمدىك عيماراتىندا قابىلداۋلار وتۋدە. وندا اتقارىلعان جۇمىستار ناتيجەسى باياندالىپ، بەلسەندى تۇرعىندارمەن ماقۇلدانىپ وتىردى. سوڭعى 9 ايدا 11 رەت جەكە قابىلداۋ وتكىزىپ، 1 217 ازاماتتىڭ ماسەلەسى تىڭدالدى. 2 341 ماسەلەنىڭ 760-سى ناقتى ءشىمىن تاپسا، 1 476-سى ورىندالۋدا، قالعان ماسەلەلەر زاڭ تالاپتارىنا سايكەس شەشىلەتىن بولادى.

بيلىك پەن حالىق اراسىنداعى بايلانىس وسىنداي اشىق ديالوگتار ارقىلى تالقىلانىپ، قالانىڭ وركەندەۋى جولىندا ءۇش جاقتى جاۋاپكەرشىلىك ورناعانىنا توقتالعان مۇرات ايتەنوۆ الداعى ۋاقىتتا دا بۇل جۇمىستار جالعاساتىنىن جەتكىزدى.
ءوز كەزەگىندە اباي اۋدانى اكىمى ب.پارمانوۆ 34 ەلدىمەكەن بويىنشا اتقارىلعان جۇمىستار مەن حالىق سۇرانىسىنداعى اۋىز سۋ، گاز، جول ماسەلەسەنىڭ شەشىمدەرى بويىنشا بايانداما جاسادى.

جيىن سوڭىندا قالا اكىمى حاتتاماعا ەنگەن ماسەلەلەردىڭ شەشىمى بويىنشا، زاڭ اياسىندا جان-جاقتى جۇمىستار اتقارىلاتىنىن اتاپ ءوتىپ، قوعامدىق ماسەلەلەردىڭ شەشىمىندە بەلسەندىلىك تانىتقان تۇرعىندارعا ريزاشىلىعىن ءبىلدىردى.
شىمكەنت قالاسى اكىمدىگىنىڭ ءباسپاسوز قىزمەتى

پىكىرلەر