مەديتسينالىق جانە فارماتسەۆتيكالىق باقىلاۋ كوميتەتىنىڭ توراعاسى بلوگەر ءارى كاسىپكەر ساۋلە بازارحان قازا تاپقان كلينيكادا بۇعان دەيىن دە ءولىم جاعدايى بولعانىن مالىمدەدى، دەپ حابارلايدى "ادىرنا" ۇلتتىق پورتالى TengriHealth-قا سىلتەپ.
كوميتەت باسشىسىنىڭ ايتۋىنشا، اتالعان مەديتسينالىق مەكەمەدە 2020 جىلى دا ليپوساكتسيادان كەيىن ناۋقاستىڭ قايتىس بولۋ فاكتىسى تىركەلگەن. ول كەزدە كلينيكا باسقا زاڭدى تۇلعا رەتىندە تىركەلىپ، وزگە اتاۋمەن جۇمىس ىستەگەن. ءجۇسىپوۆتىڭ سوزىنشە، قايعىلى وقيعادان كەيىن كلينيكاعا قاتىستى تەكسەرىستەر جۇرگىزىلىپ، سانيتارلىق رۇقسات كەرى قايتارىلعان، كەيىن سوت شەشىمىمەن مەكەمە پلاستيكالىق وپەراتسيا جاساۋ ليتسەنزياسىنان ايىرىلعان.
الايدا كەيىن مەكەمە يەلەرى جاڭا زاڭدى تۇلعا تىركەپ، قايتادان ليتسەنزيا الىپ، سول مەكەنجايدا جۇمىسىن جالعاستىرعان.
«بۇل اقپارات راستالادى. ول مەكەنجايدا بۇرىن باسقا اتاۋمەن جۇمىس ىستەگەن كلينيكادا 2020 جىلى ليپوساكتسيادان كەيىن ءولىم جاعدايى تىركەلگەن»، – دەدى باۋىرجان ءجۇسىپوۆ.
سونىمەن قاتار ول ليتسەنزيالاۋ جۇيەسىندەگى وزگەرىستەرگە دە توقتالدى. ونىڭ ايتۋىنشا، بۇرىن ليتسەنزيانى جەرگىلىكتى ورگاندار بەرگەن بولسا، كەيىن بۇل فۋنكتسيا دەنساۋلىق ساقتاۋ مينيسترلىگىنە بەرىلگەن.
قازىرگى تاڭدا قازاقستاندا پلاستيكالىق وپەراتسيا جاساۋعا ليتسەنزياسى بار 295 كلينيكا جۇمىس ىستەيدى. ونىڭ 247-ءسى – جەكەمەنشىك، 48-ءى – مەملەكەتتىك مەكەمە.
ايتا كەتەيىك، 15 مامىر كۇنى 53 جاستاعى ساۋلە بازارحان الماتىداعى پلاستيكالىق حيرۋرگيا كلينيكاسىندا ليپوساكتسيا جاساتۋ بارىسىندا كوز جۇمعان. وقيعا بويىنشا قىلمىستىق ءىس قوزعالعان.
