الماتى وبلىسىندا ەر ادام تراۆماتولوگ دارىگەرگە بالا-شاعاسىنىڭ كوزىنشە ءتىل تيگىزىپ، جاعاسىنان العانى ءۇشىن ءۇش تاۋلىككە اكىمشىلىك قاماۋعا الىندى، دەپ حابارلايدى "ادىرنا" ۇلتتىق پورتالى.
ەڭبەكشىقازاق اۋداندىق №2 سوتىنىڭ ءباسپاسوز قىزمەتى وقيعانىڭ 2025 جىلدىڭ 8 قىركۇيەگىندە اۋداندىق اۋرۋحاناسىندا بولعانى حابارلاندى.
ەر ادام جاراقات العان ۇلىن الىپ كەلگەن كەزدە دارىگەر بالانىڭ سۇيەگى سىنعان بولۋى مۇمكىن دەپ كۇدىكتەنىپ، گيپس سالۋدى ۇسىنعان. الايدا اكەسى بۇل پىكىرمەن كەلىسپەي، داۋ شىعارىپ، مەديتسينالىق قىزمەتكەرلەرگە بالاعات سوزدەر ايتقان.
سوت مالىمەتىنشە، ەر ادام الدىمەن دارىگەرگە ءتىل تيگىزىپ، كەيىن اق حالاتىنان ۇستاپ، فيزيكالىق قىسىم كورسەتكەن. دارىگەر ءوزىن قورعاۋ ماقساتىندا سوتقا شاعىمدانعان.
ايىپتالۋشى كىناسىن مويىندادى. سوت وتىرىسىندا ول ەموتسياعا بەرىلىپ كەتكەنىن ايتىپ، دارىگەردەن كەشىرىم سۇرادى. تراۆماتولوگ تا ونىڭ قاتتى اشۋلى بولعانىن جانە بىرنەشە رەت ءتىل تيگىزگەنىن راستادى.
سوت ەر ادامنىڭ ارەكەتىن قىزمەتتىك مىندەتىن اتقارىپ جاتقان مەديتسينا قىزمەتكەرىنە قۇرمەتسىزدىك كورسەتۋ دەپ تانىپ، وعان اكىمشىلىك قۇقىق بۇزۋشىلىق تۋرالى كودەكستىڭ 80-1-بابىنىڭ 2-بولىگى بويىنشا جازا تاعايىندادى.
«ايىپتالۋشى ءۇش تاۋلىككە اكىمشىلىك قاماۋعا الىندى. شەشىم زاڭدى كۇشىنە ەندى»، — دەلىنگەن سوتتىڭ ءباسپاسوز حابارلاماسىندا.
سونىمەن بىرگە سوت دارىگەرلەرگە قىسىم كورسەتۋ، قورقىتۋ نەمەسە ءتىل تيگىزۋدىڭ زاڭمەن جازالاناتىنىن ەسكە سالدى.
