قۇرمانعازى وركەسترى ۇيىمداستىرعان رەسپۋبليكالىق «شەرتپە كۇي» ءداستۇرلى مۋزىكالىق فەستيۆالى باستالدى

2158
Adyrna.kz Telegram

بۇگىن قۇرمانعازى اتىنداعى قازاق ۇلتتىق حالىق اسپاپتار وركەسترىنىڭ شاڭىراعىندا قر مادەنيەت جانە سپورت مينيسترلىگىنىڭ قولداۋىمەن قۇرمانعازى وركەسترى ۇيىمداستىرعان رەسپۋبليكالىق «شەرتپە كۇي» ءداستۇرلى مۋزىكالىق فەستيۆالى شىمىلدىعىن ءتۇردى. 

كوپتى ەلەڭ ەتكىزگەن بايقاۋعا قازاقستاننىڭ ءار وڭىرىنەن جينالعان 16 مەن 35 جاس ارالىعىنداعى شەرتپە كۇي ءداستۇرىن مەڭگەرگەن 45-كە جۋىق تالانتتى دومبىراشىلار جينالدى. فەستيۆال اياسىندا الماتى قالاسىندا «شەرتپە» داستۇرىندەگى  ورىنداۋشىلاردىڭ قاتىسۋىمەن «دومبىرا» نوميناتسياسىندا شەرتپە داستۇرىندەگى ۇزدىك ورىنداۋشىلاردى انىقتايتىن كونكۋرس وتەدى.

ۇلى دالا تورىنەن ورىن العان ۇلتىمىزدىڭ ءداستۇرلى كۇي ونەرىن دارىپتەۋدى  مۇرات تۇتاتىن بۇل  شارا  ەلىمىزدىڭ مادەني ومىرىندەگى ايشىقتى وقيعالاردىڭ ءبىرى  بولارى ءسوزسىز.

بايقاۋ 2 تۋردان تۇرادى، قاتىسۋشىلار ءداستۇرلى «شەرتپە» مەكتەبى وكىلدەرىنىڭ 5 شىعارماسىن جانە قاتىسۋشىنىڭ تاڭداۋى بويىنشا قازىرگى زامانعى كومپوزيتوردىڭ ءبىر كۇيىن ورىندايدى.

قاتىسۋشىلاردىڭ ونەر كورسەتۋىن باعالاۋ، سونداي-اق قورىتىندىلار شىعارۋ جانە جەڭىمپازداردى ايقىنداۋ ءۇشىن ءداستۇرلى ونەر سالاسىنداعى قايراتكەرلەردەن قازىلار القاسىنىڭ قۇرامى بەكىتىلگەن. اتاپ ايتقاندا: جانعالي ءجۇزباي، سەكەن تۇرىسبەكوۆ، ءبىلال ىسقاق، مۇرات ابۋعازى، باتىرجان مىقتىباەۆ.

كونكۋرس كەلەسى نەگىزگى كەزەڭدەردەن تۇرادى:

  1. 2022 جىلعى 1 جەلتوقساندا فەستيۆالدىڭ سالتاناتتى اشىلۋ ءراسىمى جانە كونكۋرستىڭ 1 تۋرى;
  2. 2022 جىلعى 2 جەلتوقسان  كونكۋرستىڭ 2 تۋرى;
  3. 2022 جىلعى 3 جەلتوقسان فينال جانە جەڭىمپازدار مەن ديپلومانتتاردى ماراپاتتاۋ راسىمىمەن وتەتىن گالا كونتسەرت.   

  

پىكىرلەر