ۇلتتىق دومبىرا كۇنىنە وراي جەتىسۋ وبلىسىندا مۇقان تولەباەۆ اتىنداعى وركەستردىڭ مۋزىكانتتارى تىكەلەي ەفيردە الەمنىڭ 10 ەلى مەن رەسپۋبليكالارىنان دومبىراشىلارىمەن بىرگە نۇرعيسا تىلەنديەۆتىڭ «القيسسا» كۇيىن ءبىر مەزەتتە ورىندادى.
مەرەكەلىك شارا تالدىقورعان قالاسىندا ءوتتى. تىكەلەي ەفير ارقىلى وعان قىتاي، اقش، تۇركيا، بەلگيا، تۇرىكمەنستان، قىرعىزستان، وزبەكستان، تاجىكستان، باشقۇرتستان جانە التاي ولكەسىنەن دومبىراشىلار قاتىسىپ، وسىلايشا قازاقتىڭ كۇي ونەرىنىڭ شەبەرلەرى مەن جاناشىرلارىن ءبىر ارناعا توعىستىردى.
كورەرمەنگە ەرەكشە اسەر قالدىرعان تەاترلاندىرىلعان پرولوگ بارىسىندا اقساقالدىڭ دومبىرانى الدىمەن جاس بۋىنعا، كەيىن بۇلدىرشىنگە سيمۆولدىق تۇردە تابىستاۋى ۇرپاقتار ساباقتاستىعى مەن ۇلتتىق مۇرانىڭ ماڭگىلىك ومىرشەڭدىگىن كوركەم بەينەلەدى. جاس ونەرپاز ورىنداعان العاشقى كۇيدى مۇقان تولەباەۆ اتىنداعى حالىق اسپاپتار وركەسترى جالعاستىرىپ، كونتسەرتتىك باعدارلامانىڭ شىمىلدىعىن اشتى.
مەرەكەلىك كونتسەرت اياسىندا حالىق اسپاپتار وركەسترى، ءداستۇرلى ءان ورىنداۋشىلارى مەن تانىمال كۇيشىلەر قازاق مۋزىكا ونەرىنىڭ تاڭداۋلى شىعارمالارىن ورىندادى. قۇرمانعازىنىڭ «اداي»، «ماحامبەت» كۇيلەرى، حالىق اندەرى مەن تەرمەلەر كورەرمەننىڭ كوڭىلىنەن شىقتى. ۇلتتىق بي انسامبلدەرىنىڭ جارقىن قويىلىمدارى مەرەكەنىڭ ۇلتتىق ناقىشىن ايشىقتاي ءتۇستى.
شارانىڭ ەڭ قىزىقتى بولىمدەرىنىڭ ءبىرى كورەرمەندەرگە ارنالعان ينتەراكتيۆتى ويىندار بولدى. قاتىسۋشىلار دومبىرا تاريحى مەن قازاقتىڭ كۇي ورىنداۋشىلىق ونەرىنە قاتىستى سۇراقتارعا جاۋاپ بەرىپ، وزدەرىنىڭ مول ءبىلىمى مەن مادەني مۇراعا دەگەن شىنايى قىزىعۋشىلىعىن كورسەتتى.
مەرەكەنىڭ ارنايى قوناعى قازاقستاننىڭ ەڭبەك سىڭىرگەن قايراتكەرى باقبەرگەن اسقاربەكوۆ ۇلتتىق دومبىرا كۇنىنىڭ ماڭىزدىلىعىنا ەرەكشە توقتالدى.
— دومبىرا – حالقىمىزدىڭ تاريحىن، دۇنيەتانىمىن جانە ءومىر سالتىن ساقتاپ كەلگەن قاسيەتتى مۇرا. وسىنداي مەرەكەلەر ارقىلى جاس ۇرپاق ۇلتتىق ونەردىڭ قادىر-قاسيەتىن تەرەڭىرەك تۇسىنەدى. جەتىسۋدىڭ شىعارماشىلىق ءداستۇرىن جالعاستىرىپ جۇرگەن ونەرپازداردىڭ، بەلگىلى كۇيشىلەر مەن جاس ورىنداۋشىلاردىڭ شەبەرلىگى ءاربىر تىڭدارماننىڭ جۇرەگىنەن ورىن تاپتى، – دەدى ول.
قالا تۇرعىنى ايناگۇل سارسەنبايقىزى دا ءوز اسەرىمەن ءبولىستى.
— بۇل كەش بىزگە تاماشا مۋزىكا سىيلادى. دومبىرانىڭ قوڭىر ءۇنى قاراتال وزەنىنىڭ جاعاسىندا ەرەكشە اسەرمەن قالىقتادى. وسىنداي مازمۇندى مادەني شارالار قوعامنىڭ رۋحاني الەمىن بايىتىپ، ۇلتتىق ونەرىمىزدىڭ ومىرشەڭدىگىن تاعى ءبىر مارتە دالەلدەيدى، – دەدى ول.
