Qańtar oqıǵasy boıynsha aıyptalǵan belsendi Qalas Nurpeıisov ózine qol jumsady. Bul jóninde 25 qarashada advokat Jalǵas Saparhanova jýrnalıst Dýman Muhammedkárimniń YouTube-taǵy «Ne deıdi» arnasynda jarııalady, dep habarlaıdy “Adyrna” ulttyq portaly «Azattyq radıosyna” siltep.
Arnanyń habarlaýynsha, Nurpeıisovtiń ózine qol jumsaýyna «tergeý organdarynyń qysymy sebep bolǵan.
Advokat arnada Nurpeıisov jazdy delingen hattyń elektrondy kóshirmesin kórsetip, mazmunyn baıandaıdy.
«Hatta Nurpeıisov jedel tergeý tobynyń ózine «terrorıst» (269-bap, 3-bólik), «uıymdastyrýshy» (272-bap 1-bólik) dep aıyp taǵyp jatqanyn, bul is boıynsha kinásiz ekenin, ózine qol jumsaǵanyn aıtyp kórsetken», - dedi Jalǵas Saparhanova.
Advokattyń aıtýynsha, belsendi ózine 24 qarashada qol jumsap, sol jaq qolynyń tamyryn kesken. Budan soń aýrýhanaǵa jetkizilip, tamyry tigilgen. Qazir onyń jaǵdaıy ortasha ekeni aıtylady.
Al tergeýshi Dáýren Jetimbekov advokatqa Nurpeıisovti qaraýylmen qalalyq prokýratýraǵa jetkizetinin aıtqan. Advokat ızolıatordyń medıınalyq bólimine habarlasqanmen ázirge jaýap ala almaǵanyn aıtty.
Azattyq tilshisi juma kúni keshke Almatydaǵy CI-18 tergeý ızolıatoryna habarlasty. Mekemeniń kezekshi bóliminde otyrǵan ózin Anelıa (famılııasy durys estilmedi) dep tanystyrǵan qyzmetker «telefonmen aqparat bere almaıtynyn, mekemege barý qajettigin» aıtty.
Advokat Jalǵas Saparhanovanyń aıtýynsha, tarıh pániniń muǵalimi, belsendi Qalas Nurpeıisovke tórt bap boıynsha aıyp taǵylǵan: eki bap (191-bap, 2-bólik, 200-bap, 2-bólik) boıynsha aıyp amnıstııamen qysqarýy tıis. Al «ǵımaratqa basyp kirý» (269-baptyń 3-bóligi) jáne «jappaı tártipsizdik» (272-bap, 1-bólik) baptary amnıstııaǵa ilinbeıdi.
Buǵan deıin Qalas Nurpeıisov pen belsendi Áıgerim Tileýjanǵa Qańtar oqıǵasy kezinde «áýejaıdy basyp almaq boldy» degen aıyp taǵylǵany habarlanǵan. Aqparatqa qaraǵanda, Tileýjanova da, Nurpeıisov te sol kúni áýejaıǵa barǵanyn moıyndaǵan, biraq tergeý taqqan aıyptardy joqqa shyǵarady. Advokat Jalǵas Saparhanovanyń aıtýynsha, Qalas Nurpeıisov 5 qańtarda «bolyp jatqan nárseni bolashaq tarıh» dep atap, oqıǵany zertteý úshin, óz kózimen kórý úshin áýejaıǵa barǵan.
