ايەلىن ولتىرگەنى ءۇشىن سوتتالعان بۇرىنعى مينيستر قۋانىش بيشىمباەۆ تۇرمە اكىمشىلىگىنە قارسى سوتقا جۇگىنگەن، دەپ حابارلايدى “ادىرنا” ۇلتتىق پورتالى.
ونىڭ ادۆوكاتى ەرلان عازىمجانوۆتىڭ ايتۋىنشا، قىلمىستىق-اتقارۋ مەكەمەسى بيشىمباەۆتىڭ تاربيەلىك ءىس-شارالارعا بەلسەندى قاتىسقانىن ەسكەرمەي، ءتيىستى كوتەرمەلەۋ شارالارىن بەرمەي وتىر.
ادۆوكاتتىڭ سوزىنشە، بيشىمباەۆ كونستيتۋتسيا كۇنىنە ارنالعان شاحمات سايىسىندا جەڭىمپاز اتانعان، سونداي-اق راقىمجان قوشقارباەۆتىڭ 100 جىلدىعىنا وراي سوتتالعاندار الدىندا ونىڭ ءومىرى مەن ەرلىكتەرى تۋرالى بايانداما جاساعان. الايدا، وعان ەشقانداي كوتەرمەلەۋ بەرىلمەگەن.
كوتەرمەلەۋ شارالارى سوتتالعاندارعا قوسىمشا كەزدەسۋلەر وتكىزۋگە مۇمكىندىك بەرەدى. بىراق ونى تەك ءۇش ايدا ءبىر رەت الۋ مۇمكىن.
قىلمىستىق-اتقارۋ جۇيەسى كوميتەتىنىڭ مالىمدەمەسىنە سايكەس، بيشىمباەۆتىڭ ءتارتىپ بۇزعانى انىقتالعان. ادۆوكاتتىڭ ايتۋىنشا، ەكس-شەنەۋنىك بۇل ەرەجەنى 2024 جىلدىڭ جەلتوقسان ايىندا بۇزعان.
“مەكەمە باسشىلىعى ونى ۇيقىدان كەيىن كىتاپ وقىعانى ءۇشىن ءتارتىپ بۇزدى دەپ ەسەپتەگەن. الايدا، قورعاۋىمداعى ادام سول ءتۇنى ءتىسى قاتتى اۋىرىپ، ءدارىسىن ءىشۋ ءۇشىن اسحاناعا كىرگەن. ءدارىنىڭ اسەر ەتۋىن كۇتىپ تۇرعان كەزدە كىتاپ وقي باستاعان. باسقا سوتتالعاندار تۇندە ەركىن ءجۇرىپ، سۋ ءىشىپ، دارەتحاناعا بارا الادى، ءتىپتى تەلەديدار كورە الادى. بىراق ءدال بيشىمباەۆقا بۇل ءتارتىپ بۇزۋ دەپ سانالعان”، – دەدى عازىمجانوۆ.
قازىرگى تاڭدا سوت بيشىمباەۆتىڭ شاعىمىن قاراستىرۋدا.
