بەلسەندى ايگەرىم تىلەۋجان وتىرعان تەرگەۋ يزولياتورىندا اشتىق اكتسياسى باستالدى، دەپ جازادى "ادىرنا" پورتالى.
الماتىدا N72 تەرگەۋ يزولياتورىنداعى ايەلدەر اشتىق جاريالادى. الماتى اۋەجايىن باسىپ الۋ ءىسى بويىنشا سوتتالعان بەلسەندى ايگەرىم تىلەۋجان دا سوندا وتىر. بۇل تۋرالى ايگەرىم تىلەۋجاننىڭ ادۆوكاتى اينارا ايدارحانوۆا حابارلادى.
ول Facebook پاراقشاسىندا اشتىق جاريالاۋعا تەرگەۋ يزولياتورىنداعى ناشار جاعداي سەبەپ بولعانىن، سونىڭ سالدارىنان كەم دەگەندە ەكى ادامنىڭ تالما اۋرۋى ۇستاعانىن جازدى.
ازىرگە قانشا ايەلدىڭ اشتىق جاريالاعانى بەلگىسىز. بىراق ولاردىڭ قاتارىندا باعداگۇل اندرەەۆا دا بار. ول وتكەن جىلدىڭ قاراشا ايىندا "جاپپاي تارتىپسىزدىكتەر ۇيىمداستىرىپ، بيلىكتى باسىپ الۋدى جوسپارلادى" دەگەن كۇدىكپەن وزىمەن بىرگە تاعى جەتى ادام ۇستالعان سوڭ قاماۋعا الىنعان.
ەسكە سالا كەتەيىك، ايگەرىم تىلەۋجان - قاڭتار وقيعاسى كەزىندە الماتى اۋەجايىن باسىپ الدى دەپ ايىپ تاعىلعان، جۋىردا ءتورت جىلعا سوتتالعان جۋرناليست ءارى بەلسەندى. وسى ءىس بويىنشا تاعى ءتورت ادام سوتتالىپ، ولاردىڭ ارقايسىسىنا سوت سەگىز جىلدان باس بوستاندىعىنان ايىرۋ جازاسىن تاعايىندادى. ۇكىم زاڭدى كۇشىنە ەنگەن جوق.
