ۇقك استانانىڭ پوليتسيا دەپارتامەنتى كوشى-قون پوليتسياسى باسقارماسىنىڭ بۇرىنعى باسشىسى ەربول ماحمەتوۆكە قاتىستى سوتقا دەيىنگى تەرگەپ-تەكسەرۋ جۇرگىزىلىپ جاتقانىن راستادى، دەپ حابارلايدى "ادىرنا" ءتىلشىسى Informburo.kz-كە سىلتەپ.
«سوتقا دەيىنگى تەرگەپ-تەكسەرۋ جۇرگىزىلىپ جاتقانىن حابارلايمىز»، – دەلىنگەن ۇقك رەسمي جاۋابىندا.
ۆەدومستۆو تەرگەۋگە قاتىستى وزگە اقپاراتتى جاريالامادى. بۇعان تەرگەۋ قۇپياسى سەبەپ بولعان.
ەسكە سالايىق، 31 تامىزدا جۋرناليست ميحايل كوزاچكوۆ ەربول ماحمەتوۆتىڭ ۇستالعانى تۋرالى حابارلاعان. ونىڭ مالىمەتىنشە، تەرگەۋ استانا قالاسى پوليتسيا دەپارتامەنتى كوشى-قون قىزمەتى باسقارماسى باسشىسىنىڭ ورىنباسارى ءاليا ماكاەۆاعا قاتىستى ىسكە بايلانىستى بولۋى مۇمكىن.
بۇعان دەيىن ۇقك ءاليا ماكاەۆاعا قاتىستى دا سوتقا دەيىنگى تەرگەۋ جۇرگىزىلىپ جاتقانىن راستاعان. كەيىن ىشكى ىستەر مينيسترلىگى تەرگەۋدى ۇقك ورگاندارى مينيسترلىكتىڭ وزىندىك قاۋىپسىزدىك دەپارتامەنتىمەن بىرلەسىپ جۇرگىزىپ جاتقانىن حابارلادى.
ءىس بويىنشا تەرگەۋ جالعاسىپ جاتىر.
