الماتى قالالىق مۇراعاتىندا «جەلتوقسان اقيقاتى» پاتريوتتىق قوزعالىس» رەسپۋبليكالىق قوعامدىق بىرلەستىگى وكىلدەرى مەن قالا تۇرعىندارىنىڭ كەزدەسۋى ءوتتى. وعان وسى بىرلەستىكتىڭ توراعاسى بولات قۇرىمباەۆ، مۇشەلەرى سەرىك مۇحاممەتاللين، ەرالى مامبەتباەۆ، الماگۇل مۇحامانوۆا، گۇلجامال كەنجەاليەۆا، عاني قالماقباەۆ جانە ت.ب. قاتىستى.
كەزەدەسۋدە جەلتوقسانشىلار وتكەن كۇنگە شەگىنىس جاساپ اڭگىمە باستاعاندا جيىلعان قاۋىمنىڭ جۇرەگىن شىمىرلاتىپ، كوزىنە جاس كەلتىردى. مىسالى، الماگۇل مۇحامانوۆا جەلتوقسان وقيعاسى كەزىندە ورىستارمەن بىرگە جۇمىس ىستەگەنىن، ءبىرىنشى كۇنى الاڭعا بارىپ، ميليتسيا قىزمەتكەرلەرىنىڭ جاستاردى ادام ايتقىسىز ايۋاندىقپەن قورلاعانىن ەزىلە جەتكىزدى. ەرتەسىنە بەت-اۋزى ءۇسىپ، جۇمىسقا بارعانىن، ول جاقتا الاڭعا شىققانىن ءبىلىپ، جازالاماق بولعانىن ايتتى. ابىروي بولعاندا جۇمىس ورىنىنداعى جاسى ەگدە تارتقان قازاق ايەلى بالەدەن امان ساقتاپ قالعان. ال گۇلجامال كەنجالينا: «كوتەرىلىس جايدان-جاي بولعان جوق. قوناەۆ اتامىزدى ورنىنان الىپ تاستاعان سەبەبى دە از بولاتىن. ارالارىڭىزدا بايقاپ وتىرمىن، جاستار دا مەنەن ۇلكەن دە كىسىلەر وتىر ەكەن. ءبىزدى سول كىسىلەر تۇسىنەدى دەپ ويلايمىن، 86 جىلعا دەيىن دە ءبىزدىڭ ەلدە قازاق ۇلتىنا قاتتى قىسىم جاسالعان ەدى. الماتىدا ءبىر عانا قازاق مەكتەبى بولدى. قوعامدىق كولىكتەگى ورىس ايەلدەرىنىڭ قىسىمى، وسىنداي-وسىنداي قازاقتى تولعاندىرعان ماسەلەلەر جيىلىپ كەلىپ جەلتوقساندا شىرقاۋ شەگىنە جەتتى» – دەدى.
جيىندا ءسوز العاندار ءبىراۋىزدان ەندى مۇنداي زۇلماتتىڭ بولماۋىن تىلەپ، تاۋەلسىزدىگىمىزدىڭ قادىر-قاسيەتىن باعالاۋعا شاقىردى. بۇل شارانى الماتى قالاسى ىشكى ساياسات باسقارماسىنىڭ قولداۋىمەن «ادىرنا» ۇلتتىق-ەتنوگرافيالىق بىرلەستىگى ۇيىمداستىردى.
جاسۇلان ءناۋرىزالى
