Almaty qalalyq muraǵatynda «Jeltoqsan aqıqaty» patrıottyq qozǵalys» Respýblıkalyq qoǵamdyq birlestigi ókilderi men qala turǵyndarynyń kezdesýi ótti. Oǵan osy birlestiktiń tóraǵasy Bolat Qurymbaev, músheleri Serik Muhammetallın, Eraly Mámbetbaev, Almagúl Muhamanova, Gúljamal Kenjealıeva, Ǵanı Qalmaqbaev jáne t.b. qatysty.
Kezedesýde jeltoqsanshylar ótken kúnge sheginis jasap áńgime bastaǵanda jıylǵan qaýymnyń júregin shymyrlatyp, kózine jas keltirdi. Mysaly, Almagúl Muhamanova jeltoqsan oqıǵasy kezinde orystarmen birge jumys istegenin, birinshi kúni alańǵa baryp, mılıııa qyzmetkerleriniń jastardy adam aıtqysyz aıýandyqpen qorlaǵanyn ezile jetkizdi. Ertesine bet-aýzy úsip, jumysqa barǵanyn, ol jaqta alańǵa shyqqanyn bilip, jazalamaq bolǵanyn aıtty. Abyroı bolǵanda jumys orynyndaǵy jasy egde tartqan qazaq áıeli báleden aman saqtap qalǵan. Al Gúljamal Kenjalına: «Kóterilis jaıdan-jaı bolǵan joq. Qonaev atamyzdy ornynan alyp tastaǵan sebebi de az bolatyn. Aralaryńyzda baıqap otyrmyn, jastar da menen úlken de kisiler otyr eken. Bizdi sol kisiler túsinedi dep oılaımyn, 86 jylǵa deıin de bizdiń elde qazaq ultyna qatty qysym jasalǵan edi. Almatyda bir ǵana qazaq mektebi boldy. Qoǵamdyq kóliktegi orys áıelderiniń qysymy, osyndaı-osyndaı qazaqty tolǵandyrǵan máseleler jıylyp kelip jeltoqsanda shyrqaý shegine jetti» – dedi.
Jıynda sóz alǵandar biraýyzdan endi mundaı zulmattyń bolmaýyn tilep, táýelsizdigimizdiń qadir-qasıetin baǵalaýǵa shaqyrdy. Bul sharany Almaty qalasy Ishki saıasat basqarmasynyń qoldaýymen «Adyrna» ulttyq-etnografııalyq birlestigi uıymdastyrdy.
Jasulan Naýryzáli
