قازاقستاندا قازاق ءتىلىنىڭ جاڭا ورفوگرافيالىق سوزدىگىن ازىرلەۋ جۇمىستارى باستالادى. بۇل تۋرالى قر ۆيتسە-پرەزيدەنتى ەرلان قارين «قىركۇيەك» نەمەسە «قىرگۇيەك» نۇسقالارىنىڭ قايسىسى دۇرىس جازىلۋى كەرەك دەگەن پىكىرتالاسقا قاتىستى پىكىر ءبىلدىرىپ، حابارلادى، دەپ جازادى “ادىرنا”.
قازاق ءتىلى مەملەكەتتىك ءتىل مارتەبەسىنە يە جانە ءىس جۇرگىزۋ سالاسىندا كەڭىنەن قولدانىلاتىندىقتان، سوزدەردىڭ ايتىلۋى مەن جازىلۋىنا قاتىستى بىرىڭعاي نورمالاردىڭ بولۋى مەملەكەتتىك اپپارات جۇمىسىنىڭ تيىمدىلىگىنە تىكەلەي اسەر ەتەدى. ۆيتسە-پرەزيدەنتتىڭ ايتۋىنشا، مەملەكەت بۇل رەتتە تىلدىك نورمالاردى ءوزى بەلگىلەمەيدى، تەك وسى باعىتتاعى مامانداردىڭ جۇمىسىن ۇيلەستىرەدى.
«ارينە، مەملەكەت بەلگىلى ءبىر ءسوزدىڭ قالاي جازىلۋى كەرەگىنە ارالاسا المايدى جانە ارالاسپايدى. بۇل – سالا ماماندارى مەن عالىمداردىڭ جۇمىسى. ءبىزدىڭ مىندەتىمىز – وسى جۇمىستى ءتيىمدى ۇيلەستىرۋ. سوندىقتان ەلدەگى ءتىل ساياساتىن جۇزەگە اسىرۋعا جاۋاپتى مەكەمەلەردىڭ باسشىلارىن جانە بەلگىلى عالىمداردى جيناپ، وسى ماسەلە بويىنشا پىكىر الماستىق»، – دەدى ەرلان قارين.
كەزدەسۋ قورىتىندىسى بويىنشا بەدەلدى ءتىل ماماندارىنان ارنايى جۇمىس توبىن قۇرۋ تۋرالى شەشىم قابىلداندى. جۇمىس توبىنىڭ نەگىزگى مىندەتى – قازاق ءتىلىنىڭ جاڭا ورفوگرافيالىق سوزدىگىن ازىرلەۋ. دايىن بولعان ەڭبەك كەيىن ۆەدومستۆوارالىق كوميسسيانىڭ وتىرىسىندا قارالىپ، بەكىتىلەدى.
