سايلاۋ باستالعالعاننان 12:05 ساعاتقا دەيىن پاۆلودار وبلىسىنداعى بارلىق داۋىس بەرۋشىلەردىڭ جارتىسىنا جۋىعى ءوز تاڭداۋىن جاساپ ۇلگەردى.
ايماقتاعى داۋىس بەرۋشىلەردىڭ 44,23 پايىزى ءوز تاڭداۋىن جاساعان. پاۆلودار ەلىمىز بويىنشا بەلسەندى وڭىرلەردىڭ ءبىرى بولىپ وتىر.
سايلاۋ ۋچاسكەلەرىنىڭ جانىندا جۇرتشىلىققا ارنالعان جارمەڭكەلەر ۇيىمداستىرىلىپ جاتسا، كەيبىرىندە كوڭىلدى اۋەن ويىناپ، تارتىمدى مۋزىكا قويىلعان. ەڭ باستىسى، ناۋقان قالىپتى، تالاپقا ساي وتۋدە. ەشقانداي زاڭبۇزۋشىلىق تىركەلگەن جوق، دەيدى تاۋەلسىز باقىلاۋشىلار.
داۋىس بەرگەن ازاماتتاردىڭ اراسىندا جاقىندا عانا قازاقستاننىڭ ازاماتتىعىنا يە بولعان قانداسىمىز جانىبەك بەكبولاتۇلى دا بار.
“مەن ءۇش اي بۇرىن مونعوليادان اتامەكەنگە ورالعان ەدىم. وسىدان ءبىر اپتا بۇرىن عانا قازاقستاننىڭ تولىققاندى ازاماتى اتانىپ، جەكە كۋالىگىمدى قولعا الدىم. بۇگىن مىنە، ءوز ەلىم، قازاق ەلىنىڭ پرەزيدەنتىن سايلاۋعا داۋىس بەردىم. ارينە، ەرەكشە اسەردە، تولقىپ تۇرمىن”، - دەيدى جانىبەك بەكبولاتۇلى.
ورتالىق سايلاۋ كوميسسياسىنىڭ جاريالاعان اقپاراتى بويىنشا، كۇندىزگى 12:05 ساعاتقا دەيىن ەلىمىز بويىنشا 4,6 ميلليون قازاقستاندىق داۋىس بەرگەن.
ەستەرىڭىزگە سالا كەتەيىك، كەشكى ساعات 20:00 گە دەيىن اركىم ءوز سايلاۋ ۋچاسكەسىندە داۋىس بەرە الادى.
