Saılaý bastalǵalǵannan 12:05 saǵatqa deıin Pavlodar oblysyndaǵy barlyq daýys berýshilerdiń jartysyna jýyǵy óz tańdaýyn jasap úlgerdi.
Aımaqtaǵy daýys berýshilerdiń 44,23 paıyzy óz tańdaýyn jasaǵan. Pavlodar elimiz boıynsha belsendi óńirlerdiń biri bolyp otyr.
Saılaý ýchaskeleriniń janynda jurtshylyqqa arnalǵan jármeńkeler uıymdastyrylyp jatsa, keıbirinde kóńildi áýen oıynap, tartymdy mýzyka qoıylǵan. Eń bastysy, naýqan qalypty, talapqa saı ótýde. Eshqandaı zańbuzýshylyq tirkelgen joq, deıdi táýelsiz baqylaýshylar.
Daýys bergen azamattardyń arasynda jaqynda ǵana Qazaqstannyń azamattyǵyna ıe bolǵan qandasymyz Jánibek Bekbolatuly da bar.
“Men úsh aı buryn Monǵolııadan atamekenge oralǵan edim. Osydan bir apta buryn ǵana Qazaqstannyń tolyqqandy azamaty atanyp, jeke kýáligimdi qolǵa aldym. Búgin mine, óz elim, Qazaq eliniń Prezıdentin saılaýǵa daýys berdim. Árıne, erekshe áserde, tolqyp turmyn”, - deıdi Jánibek Bekbolatuly.
Ortalyq saılaý komıssııasynyń jarııalaǵan aqparaty boıynsha, kúndizgi 12:05 saǵatqa deıin elimiz boıynsha 4,6 mıllıon qazaqstandyq daýys bergen.
Esterińizge sala keteıik, keshki saǵat 20:00 ge deıin árkim óz saılaý ýchaskesinde daýys bere alady.
