ەلىمىزدىڭ بىرنەشە وڭىرىندە سۋ تاسقىنى ءجۇرىپ، توتەنشە جاعداي جاريالاندى. جىل سايىن قايتالاناتىن سۋ تاسقىنىنا بيلىكتىڭ نەگە دايىن بولماعانىنا گيدرولوگ عالىم جاۋاپ بەردى، دەپ حابارلايدى "ادىرنا" ءتىلشىسى.
گيدرولوگ عالىم مارات مولداحمەتوۆ سۋ تاسقىنى جايىندا بىرنەشە مالىمەتتەر ۇسىندى.
"عارىش ساپارى مەكەمەسى العان 1,4 ملرد تەڭگە قارجى نەگە اقتالمادى؟ ءبارىنىڭ جاۋابى بىرەۋ-اق: بىلىكتى ماماندار تاپشى. عالىمدارعا جاعداي جاسالماي، ەشنارسە تۇزەلمەيدى. بىلىكتى مامانعا جول بەرىلمەيدى، جەمە-جەمگە كەلگەندە سول مامانداردىڭ اقىلىنا جۇگىنەدى. تورعاي وڭىرىندە اپاتتىق سۋ تاسقىنى بولاتىنى بەسەنەدەن بەلگىلى بولدى. بىلتىرعى ۇلىتاۋداعى جۇتتان كەيىن-اق، كوكتەمدە ۇلكەن سۋ تاسقىنى بولاتىنى ايقىن ەدى", - دەلىنگەن عىلىم-ءبىلىم بار جۇرتتار Telegram ارناسىندا.
عالىم جازباسىندا گالپەريننىڭ «ۋروۆني رەك كازاحستانا» دەگەن مونوگرافياسى بار ەكەنىن، بىرنەشە دەرەكتەردى ۇسىندى.
"الەۋمەتتىك جەلىدە بۇرىنعى قاراتورعاي سوۆحوزىنا باراتىن جول بۇزىلدى دەگەن ۆيدەو شىققان كۇنى-اق، قىزىلجۇلدىزدى سۋ الاتىنى بەلگىلى بولعان.
ءبىزدىڭ تۇبىمىزگە بەيعامدىق جەتەدى. گەواقپاراتتىق جۇيەنىڭ 3D مودەلدەرى ارقىلى جەر بەدەرىن ەسەپكە الىپ، وزەن ارناسى قاي بيىكتىكتەن، ياعني جارقاباقتان باستاپ جايىلا باستايتىنىن انىقتاۋعا بولادى. وزەننىڭ ۇزىنا بويىمەن وسىنداي ءالسىز جەرلەردى انىقتاپ، ۇسىنىستار بەرۋگە بولادى. ماسەلە كەشەندى تۇردە قارالۋى كەرەك. سۋ سالاسى مەكەمەلەرىندە وتىرعان باسشىلار مەن گيدرولوگ، مەتەورولوگ عالىمدار، گيدروتەحنيكتەر ءبىر تىلدە سويلەسۋى كەرەك. تەماتيكالىق كارتالار جاسالۋى ءتيىس. سۋ تاسقىنىن باسقارۋ ءۇشىن باسشىلار ەڭ بولماعاندا قاراپايىم ۇعىمداردى ءبىلۋى كەرەك", - دەپ سىنادى عالىم.
