بەلگىلى اقىن مۇحامەدجان تازابەك الەكس لەسليدىڭ اتىشۋلى ترەنينگىن توقتاتۋ ءۇشىن باستاما كوتەردى. بۇل تۋرالى ول Instagram پاراقشاسىنا جازدى، دەپ حابارلايدى، “ادىرنا” ۇلتتىق پورتالى.
"مەنىڭ قولىما كامەرا العىزىپ، مەنى ۋايىمداتىپ تۇرعان جاعداي بار. ول - 19 قاراشا كۇنى الماتى قالاسىنا ارنايى كەلە جاتقان كورشى ەلدىڭ بۇلىكشى بلوگەرى جايىندا. الەكس لەسلي دەگەن ادام الماتىعا كەلىپ، قازاق قىزدارىن جاۋاپسىز توسەك قارىم-قاتىناسىنا ۇيرەتۋ ءۇشىن، قازاق قىزدارىنىڭ ار-ۇياتىن قالاي وڭاي تاپتاۋعا بولاتىنىنىڭ بۇكىل ۇلگىسىن كورسەتۋ ءۇشىن كەلە جاتىر ەكەن. "جامان ءۇيدى قوناعى بيلەيدى" عانا ەمەس، وسى ەلگە كەلىپ بۇلىك سالىپ، ءبىزدىڭ ەڭ قىمباتتى بولعان قىزدارىمىزدىڭ ار-ۇياتىن اياققا تاپتاتۋعا كەلە جاتقان ادامعا بارىنشا قارسى تۇرىپ، ونىڭ جولىن كەسۋىمىز كەرەك. جىگىتتەرىمىزدىڭ ار-ۇياتى، ايبىنى ازايعان سايىن وسىنداي باسىنۋشىلار كوبەيىپ كەتەدى. ارقايسىڭىز توڭىرەگىڭىزگە داۋسىڭىز بەن ءسوزىڭىز جەتكەنشە بۇل نارسەدەن ساقتاندىرۋعا شاقىرامىن", - دەدى اقىن.
سونداي-اق، ول دەپۋتاتتارعا جازىپ، مالىمدەمە جاساۋ كەرەگىن دە ايتتى.
"قىزىڭدى قورلايمىن دەسە ءۇنىمىز شىقپايدى، قاتىنىڭدى زورلايمىن دەسە دىمىمىز شىقپايدى... جاتتىڭ جاۋلاۋى مەن بوتەننىڭ بۇزىقشىلىعىنا ءماۋ دەمەيمىز... قايداسىڭ كومەنتتىڭ كومانديرلەرى مەن ديزلايكتىڭ ديۆيزياسىندا جۇرگەندەر؟!" - دەيدى.
ەسكە سالايىق، الەكس لەسلي لاقاپ اتىمەن تانىمال الەكساندر كۋريللوۆ 19-27 قاراشا ارالىعىندا الماتى قالاسىندا قىزداردى ارباۋ تەحنيكاسى بويىنشا ترەنينگ وتكىزەتىنىن مالىمدەگەن. بۇل حالىق اراسىندا كوپ داۋ تۋعىزعان ەدى.
