ەنەرگەتيكا مينيسترلىگى «تەڭىزشەۆرويل» وندىرىستىك نىساندارىنداعى قازىرگى جاعدايعا قاتىستى مالىمدەمە جاسادى، دەپ حابارلايدى «ادىرنا» ءتىلشىسى.
مينيستر ەرلان اقكەنجەنوۆتىڭ تاپسىرماسىمەن ەنەرگەتيكا ۆيتسە-ءمينيسترى قايىرحان تۇتقىشباەۆ تەڭىز كەن ورنىنا بارعان.
«جاعدايدى باقىلاۋدا ۇستاۋ جانە وپەراتورمەن ءوزارا ءىس-قيمىلدى ۇيلەستىرۋ جۇمىستارى جۇرگىزىلۋدە. 18 قاڭتاردا بولعان تەحنولوگيالىق بۇزۋشىلىقتى (گاز تۋربينالىق قوندىرعىلارىنىڭ ءوشۋى) تولىق انىقتاۋ ماقساتىندا ارنايى كوميسسيا قۇرىلىپ، جۇمىسقا كىرىستى»،-دەلىنگەن حابارلامادا.
كوميسسيا قۇرامىنا مەملەكەتتىك ەنەرگەتيكالىق قاداعالاۋ كوميتەتىنىڭ اۋماقتىق دەپارتامەنتى، اتىراۋ وبلىسى اكىمدىگىنىڭ ەنەرگەتيكا باسقارماسى، «KEGOC» جانە «تەڭىزشەۆرويل» وكىلدەرى كىرگەن.
مۇناي ءوندىرۋدى ۋاقىتشا توقتاتۋ وپەراتور تاراپىنان پەرسونالدى جانە جابدىقتى قورعاۋ ماقساتىندا قاۋىپسىزدىك پروتوكولدارىنا سايكەس قابىلدانعان.
قازىرگى ۋاقىتتا كوميسسيا بولعان جاعدايدىڭ سەبەپتەرىن ەگجەي-تەگجەيلى تەحنيكالىق تالداۋدا.
«بارلىق رەسمي قورىتىندى مەن پىكىرلەر تەك كوميسسيا جۇمىسىنىڭ ناتيجەسى بويىنشا جاريالانادى. جاعداي ەنەرگەتيكا مينيسترلىگىنىڭ باقىلاۋىندا»،-دەپ قوستى مينيسترلىك.
بۇعان دەيىن "تەڭىزشەۆرويل" تەڭىزدە ەلەكتر گەنەراتورلارىندا ەكى ءورتتىڭ بولعانىن ايتقان ەدى.
