بۇگىن، 15 قاراشادا، اتىراۋ قالاسىنىڭ №2 سوتى اتىراۋ وبلىسى اكىمىنىڭ بۇرىنعى ورىنباسارى باقىتگۇل حامەنوۆانى 7 جىلعا بوستاندىعىنان ايىرۋ، الايدا كامەلەتكە تولماعان بالالارى بارىن ەسكەرە وتىرىپ، جازانى ءۇش جىلدان كەيىن وتەۋ جونىندە ۇكىم شىعاردى. سوت ۇكىمىنە سايكەس اقىلبەك رىسقاليەۆ تە 7 جىلعا باس بوستاندىعىنان ايىرىلدى. باقىتگۇل حامەنوۆا تۋىسقاندارىمەن قاۋىشۋ ساتىندە قىسقا سۇحبات بەردى، دەپ حابارلايدى "ادىرنا" ۇلتتىق پورتالى.
- مەن بۇل شەشىممەن مۇلدە كەلىسپەيمىن. 11 اي بويى تار قاپاستا جاتقاندا دا اقيقاتتى ايتىپ، شىندىقتى سويلەپ، وسىمەن كۇرەستىم. كۇرەسە دە بەرەمىن. ادۆوكاتىممەن. قاۋمالاعان ەلمەن. اققا قۇداي جات. وسى ءساتتى پايدالانا وتىرىپ مەن شيبورىدەي شۋلاعان توبىردىڭ عايباتىنا ەمەس، شىندىقتى ايتىپ شىرىلداعان، دەرەك پەن دايەككە سەنگەن باق وكىلدەرىنە، جۋرناليستەرگە، 11 اي بويى اناما كەلىپ، ءبىر اۋىز جىلى سوزدەرىن ارناپ جاتقان ەلىمە راقمەت ايتامىن. شىندىق ءتۇبى اشىلادى... ماعان زورلىق پەن قورلىقتى كورسەتكەن ادامدارعا ايتارىم - ادامنىڭ سوتىنان قۇتىلعانىمەن دە، اللانىڭ سوتىنان ەشكىم قۇتىلمايدى، - دەدى باقىتگۇل حامەنوۆا
باقىتگۇل حامەنوۆا جازاسىن قاۋىپسىزدىگى ورتاشا مەكەمەدە 3 جىلدان كەيىن وتەيدى. حامەنوۆا سوت زالىنان ۇيىنە جىبەرىلەدى. سوت عيماراتىنىڭ الدىندا ونى ەت جاقىندارى مەن قولداۋشىلارى كۇتىپ الدى.
ايتا كەتەيىك، حامەنوۆا مەن رىسقاليەۆ اباي ەسكەرتكىشىن جاساۋ بويىنشا مەملەكەتتىك ساتىپ الۋ كەزىندە 4,5 ميلليون تەڭگە كولەمىندە پارا الدى دەگەن كۇدىككە ءىلىندى ەدى.
