شىمكەنتتە نۇراي سەرىكبايدىڭ ولىمىنە قاتىستى قىلمىستىق ءىس بويىنشا الدىن الا سوت تىڭداۋى ءوتتى، دەپ حابارلايدى "ادىرنا" ۇلتتىق پورتالى.
مەملەكەتتىك ايىپتاۋشى سوتتالۋشى شەرحان ايماحانعا تاعىلعان ايىپتاردى جاريالادى. پروكۋروردىڭ ايتۋىنشا، ايىپتاۋ اكتىسى ءۇش ەپيزودتان تۇرادى. ولار – ادام ۇرلاۋ جانە نەكەگە ماجبۇرلەۋ، جابىرلەنۋشىنى قۋدالاۋ (ستالكينگ) جانە ادام ءولتىرۋ.
مەملەكەتتىك ايىپتاۋ تاراپىنىڭ مالىمەتىنشە، شەرحان ايماحان مەن نۇراي سەرىكباي 2025 جىلدىڭ شىلدە ايىندا ورتاق تانىستارىنىڭ تويىندا تانىسقان. كەيىن ولار الەۋمەتتىك جەلى ارقىلى سويلەسىپ جۇرگەن. تەرگەۋ نۇسقاسىنا سايكەس، 2025 جىلدىڭ 4 قازاندا ايماحان نۇراي تۇرعان جالدامالى پاتەرگە بارىپ، ونى وزىنە تۇرمىسقا شىعۋعا ماجبۇرلەگەن. كەيىن قىزدى كولىگىنە وتىرعىزىپ، الماتىدان شىمكەنتكە الىپ كەتكەن.
پروكۋراتۋرانىڭ مالىمەتىنشە، نۇرايدىڭ تۋىستارى كەيىن ونى الىپ كەتۋگە بارعانىمەن، قىزدى بىردەن شىعارا الماعان. كەيىن وقيعا ورنىنا پوليتسيا كەلىپ، ەكى تاراپتى بولىمشەگە جەتكىزگەن. الايدا ءتيىستى تەكسەرۋ ماتەريالدارى تىركەلمەگەنى ايتىلدى. وسى وقيعادان كەيىن نۇراي تۋىستارىمەن بىرگە ۇيىنە قايتقان.
ايىپتاۋ تاراپى بۇل ارەكەتتەردى قىلمىستىق كودەكستىڭ ادام ۇرلاۋ بابىمەن سارالاعان.
پروكۋروردىڭ ايتۋىنشا، اتالعان وقيعادان كەيىن ايماحان نۇرايمەن قايتا بايلانىس ورناتۋعا بىرنەشە مارتە ارەكەت جاساعان. تەرگەۋ دەرەكتەرىنە سايكەس، ول قىزعا ونداعان رەت تەلەفون شالىپ، ءۇيىنىڭ ماڭىنا بارىپ كۇتكەن، الەۋمەتتىك جەلى ارقىلى دا اقپارات تاراتۋعا تىرىسقان.
ايىپتاۋ اكتىسىندە نۇرايدىڭ بىرنەشە رەت تەلەفون ءنومىرىن اۋىستىرۋىنا قاراماستان، سوتتالۋشىنىڭ ونى ىزدەۋدى توقتاتپاعانى ايتىلعان. بۇل ەپيزود بويىنشا وعان قىلمىستىق كودەكستىڭ قۋدالاۋ (ستالكينگ) بابىمەن ايىپ تاعىلعان.
پروكۋراتۋرانىڭ مالىمەتىنشە، 2026 جىلعى 10 قاڭتاردا شەرحان ايماحان شىمكەنتتەگى نۇراي تۇرعان ءۇيدىڭ ماڭىنا الدىن الا پىشاق الىپ كەلگەن. تەرگەۋ نۇسقاسىنا سايكەس، قىز كەزدەسۋدەن باس تارتقاننان كەيىن كۇدىكتى وعان بىرنەشە رەت پىشاق سۇققان. كۋاگەرلەردىڭ ارالاسۋىنان كەيىن ول وقيعا ورنىنان قاشىپ كەتكەن.
نۇراي سەرىكباي اۋىر جاراقاتتان كەيىن 2026 جىلى 11 قاڭتاردا كوز جۇمدى.
