قازاقستان فينليانديادا ۇستالعان ۇشاق ۇشقىشىنىڭ ەلىمىزگە ۇشىپ بارا جاتىرمىن دەگەن مالىمدەمەسىن جوققا شىعاردى، دەپ حابارلايدى “ادىرنا” Tengri Travel سايتىنا سىلتەپ.
ازاماتتىق اۆياتسيا كوميتەتى ليتۆالىق تىركەۋدەگى جەكە ۇشاقتىڭ قازاقستانعا ۇشۋ جوسپارلارى تۋرالى اقپاراتتى راستاعان جوق. ۆەدومستۆودان كەلىپ تۇسكەن رەسمي جاۋاپتا، كوميتەتكە ەرەكشە رەيس جاساۋعا رۇقسات الۋ تۋرالى ءوتىنىش تۇسپەگەنى ايتىلعان.
«قولدا بار اقپارات بويىنشا، LY-ARA تىركەۋ ءنومىرى بار اۋە كەمەسىنەن ەرەكشە رەيس جاساۋعا رۇقسات الۋ تۋرالى ءوتىنىش كوميتەتكە تۇسكەن جوق»، – دەپ مالىمدەدى قگا.
ەستەرىڭىزگە سالا كەتەيىك، 4 جەلتوقسان كۇنى حەلسينكي اۋەجايىندا ۇستالعان Beechcraft B55 Baron ۇشاعى فين بيلىگىندەگى كۇدىكتەردى تۋعىزدى. سەبەبى ول سانكتسيالاردى اينالىپ ءوتۋ مۇمكىندىگىنە بايلانىستى تەكسەرىلگەن. العاشىندا ۇشاق پسكوۆ قالاسىنا باعىتتالعانى حابارلانعان ەدى، بىراق ۇشاقتا بولعان لاتۆيالىق پيلوت روبەرتس كليموۆيچ رەيستىڭ سوڭعى باعىتى قازاقستان ەكەندىگىن ايتىپ، وندا اۆياتسيالىق جوبالاردى جۇزەگە اسىرۋدى جوسپارلاعانىن مالىمدەگەن.
