Almatyda 3 mlrd teńgege salynǵan mektep qaq aıyrylýy múmkin. Ǵımarattyń qabyrǵalary qaqyrap, irgetasy shóge bastaǵan, dep habarlaıdy “Adyrna” ulttyq portaly “Qazaqstan” ulttyq arnasyna siltep.
Alańdaýly ata-analardyń keıbiri balalarymyzdy sabaqqa jibermeımiz dep bekinip otyr.
«Men talaıdy kórdim biraq, mynadaı qurylys normalarynda osyndaı ekige bólip, bylaı qańyltyrmen jaýyp qoıdy degendi birinshi ret kórdim. Qurylysshylardan surasaq, múmkin emes dep tań qalady. Qalaı tolyq betonnan quıylǵan ǵımarat osylaı ekige bólinip turady?!», - deıdi qoǵamdyq birlestik ókili Bolat Ábiljanov.
Saldarynan ǵımarattyń aldyńǵy bóliginiń irgetasy shóge bastaǵan. Ony myna jaryqtardan anyq ańǵarýǵa bolady. Shetelde issaparda júrmin degen mektep dırektory problemalardy telefonmen jetkizdi.
«Qurylys sapasyz júrgizilgendikten jańbyr jaýǵan kezde tóbesinen sý aǵady. Qabyrǵalary jaryla bastaǵan, dálizdegi kafelderi kóterilip jatyr. Joba boıynsha eń qymbat esikter salynýy kerek bolsa, 12 myńdyq qaǵaz esikter salynǵan», - deıdi №202 mektep-gımnazııasynyń dırektory Bolat Janaıhan.
Synyptardaǵy eden de oıylyp, ishine túsip jatyr. Nysan qurylysyna tapsyrys bergen jáne ony qabyldaǵan Almaty qalalyq Qurylys basqarmasyna habarlastyq. Olar tekseris júrgizýge ýáde etti.
«202 mektebimiz 10 bólek blok dep atalady. Sol bloktardyń quralǵan jeri antıseısmıkalyq tigis bar. Ol bloktardy ózara qosady. Seısmıkalyq jaǵdaıda mektep qabyrǵalarynyń tolqýyn durystaý úshin berilgen. Merdiger mekeme, tehnıkalyq baǵdarlaý mamandary bar. Taǵy da jumystar júrgiziledi. Shıkilikter bolsa, jóndeý jumystaryn jasap beremiz», - dedi qalalyq Qurylys basqarmasy basshysynyń orynbasary Oljas Tájibaev.
Basqarma basshylyǵy ǵımarattyń apatty jaǵdaıda emestigin alǵa tartyp, kem-ketigi jyl sońyna deıin túzetiledi dep sendirdi. 1200 balaǵa shaqtalǵan bilim oshaǵynda qazir 2000-nan astam oqýshy oqyp jatyr.
