16 قاڭتار كۇنى الماتى قالاسى ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىندا اقىن، قازاقستان جازۋشىلار وداعى توراعاسىنىڭ ورىنباسارى باقىت بەدەلحاننىڭ “9 گرامم” ينتەللەكتۋالدى پوەتيكالىق دراماسىنىڭ تۇساۋكەسەرى ءوتتى.
تۋىندىنىڭ رەجيسسەرى جۇلدىزبەك جۇماتاي جانە دىبىسپەن كوركەمدەگەن سازگەر قانات يبراگيموۆ.
پوەتيكالىق درامانى قاراساي اۋدانىنىڭ “قاراساي جاستارى” تەاترى ساحنالاپ، ونەر سۇيەر قاۋىمنىڭ ىستىق ىقىلاسىنا بولەندى. تاۋەلسىزدىگىمىزدىڭ تاريحىنا دەيىن “9 گرامم” وققا بايلانعان «الاش» ارىستارىنىڭ رۋحىنا ارنالعان بۇل قويىلىم، تىڭ تۋىندى رەتىندە كورەرمەن كوڭىلىنەن شىقتى. پرەمەرادا قازاقستاننىڭ ەڭبەك ەرى، قازاقستان تەاترلار اسسوتسياتسياسىنىڭ پرەزيدەنتى، كينو جانە تەاتر اكتەرى، پروفەسسور ءاسانالى ءاشىموۆ “قاراساي جاستارى” تەاترىنا ساتتىلىك تىلەپ، اق باتاسىن بەردى.
كەش سوڭىندا «قاراساي اۋدانىنىڭ ىشكى ساياسات، مادەنيەت، تىلدەردى دامىتۋ جانە سپورت ءبولىمىنىڭ» باسشىسى كۇلجان ادىلحانقىزى دۇيسەنوۆا، ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترى ۇجىمىنا جانە باسشىسىنا «قاراساي جاستارى» تەاترىنىڭ رەسپۋبليكالىق دەڭگەيدە ونەر كورسەتىپ شىعارماشىلىق دامۋىنا ۇيىتقى بولعانى ءۇشىن اۋدان اكىمىنىڭ العىسىن جەتكىزدى.
سونداي-اق جاس ۇرپاقتى قاسيەتتى ونەرگە باۋلىپ، يگى داستۇرلەردى جالعاستىرىپ «قاراساي جاستارى» تەاترىنا قولداۋ كورسەتىپ جۇرگەن اقىن باقىت بەدەلحانعا جانە قويىلىم كومپوزيتورى قانات يبراگيموۆقا كورەرمەن الدىندا اۋدان اكىمى جاسۇلان توققوجاۇلى ەستەنوۆتىڭ العىس حاتى تاپسىرىلدى. تەاتر زالى كورەرمەنگە لىق تولىپ، قويىلىم جوعارى دەڭگەيدە ءوتتى.
