19 qazan kúni Almaty qalasyndaǵy №44 kitaphana bólimshesinde jas aqyn Nursáýle Tolqynnyń tyrnaqaldy týyndysynyń tusaýy kesildi, dep habarlaıdy “Adyrna” ulttyq portaly
Kitap “Topyraq ıisi” dep ataldy. 86 betten turatyn eńbekte aqynnyń 70-ten astam óleńderi jınaqtalǵan.
Túsaýkeserge etnograf, jazýshy Baıahmet Jumabaıuly, aqyn, ustaz Murat Shaımaran, rejısser Turdybek Maıdan, aqyn Hamıt Aıdar, kitaphanashy Darııa Nurmuhanbetova men birneshe aqyn zamandastary jáne №44 kitaphana bólimshesiniń ujymy men №205 mektep oqýshylary, jaqyndary men áriptesteri qatysty.
Keshti aqyn Ádil Ahmetuly tizgindedi. Al tusaýyn elge syıly jazýshy, belgili etnograf ǵalym Baıahmet Jumabaıuly kesti.
Nursáýleniń alǵashqy kitaby kóptiń kóńilinen shyǵyp, úlkenderdiń ystyq lebizine ıe boldy. Jıynnyń shymyldyǵyn ashqan etnograf ǵalym Baıahmet Jumabaıuly batasyn berip, tilegin aıtty. Al aqyn Murat Shaımaran Nursáýleniń “Topyraq ıisi” eńbegine pikirin bildirip, joǵary baǵa berdi.
“Poezııanyń júgi, ol-álemniń júgi, ǵalamnyń júgi, adamnyń muńynyń salmaǵy. Al ol salmaqty Nursáýle sekildi talshyqtaı qyzdyń kóterip ketýi eki talaı. Biraq Nursáýle ony kótere bildi”,-dedi aqyn Murat Shaımaran.
Keshte ystyq lebiz de, tilek te aıtyldy. Odan bólek kúı shertilip, qazaqtyń áýezdi áni shyrqaldy. Saǵynyshqa quralǵan Nursáýleniń óleńderin oqýshylar kezekpen oqydy.
Nursáýle aqyndyqty boıyna sińirip qana qoımaı, anımaııa salasyn da meńgergen. Búginde balalarǵa arnalǵan Otandyq birneshe mýltfılmniń avtory. Sondyqtan jıynǵa áriptesi ári ustazy Turdybek Maıdan qatysty. Ol Nursáýleni jańa qyrynan tanyǵanyn jasyrmady.
“Urpaqty tárbıeleýge, balalardyń qazaqı tanymyn umytyp qalmaýyna úlesin qosyp júr. Mine, búgin aqyndyq qyryn da baıqap otyrmyn. Jazaryń kóp bolsyn. Shyǵarmashylyq tabys tileımin”,- dedi rejısser.
Is-sharada kitaphana qoryna jańa kitap syıǵa tartylyp, qatysýshylarǵa da tabystaldy. Jıyn sońynda Nursáýle Tolqyn jıylǵan qaýymǵa alǵysyn bildirip, óleńimen shashýyn shashty.
Aıta keteıik, Nursáýle Tolqyn – aqyn, senarıst. 1995 jyly 4 qyrkúıekte QHR Ile oblysy, Nylqy aýdanynda dúnıege kelgen. 2013 jyly atamekenge taban tiregen. Qoja Ahmet Iasaýı atyndaǵy HQTÝ-dyń fılologııa fakýltetiniń túlegi. Óleńderi birneshe jyr jınaqqa engizilgen.
Jas aqynnyń alǵashqy eńbegi qazaq ádebıetiniń bir kirpishi bolyp qalanary sózsiz. Nursáýlege shyǵarmashylyq tabys tilep, jazaryń kóp bolsyn deımiz! Qalamyń ushtala bersin!
“Adyrna” ulttyq portaly
