ەلىمىزدىڭ بايتاق دالاسىندا ەمەس، سىرتتا جۇرگەن تالاي قانداسىمىز ەڭبەگى مەن اقىلىنا سەنىپ، كوزگە ءتۇسىپ قازاقتىڭ ابىرويىن اسىرىپ جۇرگەنى قانشاما. بۇل جازباما، الەمنىڭ ەكىنشى ەكونوميكالىق دەرجاۆاسى سانالاتىن الىپ قىتاي فلوتىنىڭ ەڭ ايبارلى «لياونين» تەڭىز كەمەسىن قازاقتىڭ قاراكوز قىزى جادىرا قابىلقىزىنىڭ باسقاراتىنى تۇرتكى بولدى.
قىتايدىڭ شىڭجاڭ ولكەسىندە دۇنيەگە كەلىپ، چانجي كوللەدجىنىڭ ەكونوميكا جانە مەنەدجمەنت ماماندىعىن اياقتاعان جادىرا، 2015 جىلى اسكەرگە شاقىرىلعان ەكەن.
وسى كۇندەرى قۇرامىندا 2 مىڭعا جۋىق ادامى، ونىڭ 520 وفيتسەر، 50-گە جۋىق ۇشاق پەن تىكۇشاققا اەرودرومى بار اسكەري كەمەنىڭ ۇشى-قيىرى جوق مۇحيتتا ەركىن ءجۇزۋى قانداسىمىز جادىرا قابىلقىزىنىڭ اسكەري شەبەرلىگىنە ءتيىسىلى. بىردە جادىرانىڭ قىتاي تىلشىلەرىنە بەرگەن سۇقباتىندا، «مەنىڭ جاسىمداعى نازىكجاندىلار كولىك تىزگىندەيدى، ال مەن الىپ تەڭىزدە كەمە جۇرگىزىپ، دۇلەي داۋىلمەن تايتالاسامىن» دەگەنى، جادىراداي سىرتتاعى قانداستىرىمىز ءۇشىن كوكىرەگىمىزدى تەك قۇرمەت پەن ماقتانىش سەزىمى كەرنەيدى.
راسىندا، كەشەگى 1-قىركۇيەكتەگى پرەزيدەنتتىڭ قازاق جۇرتىنا جولداعان جولداۋىندا، شەتەلدەگى قانداستاردى كوشىرۋ، ميگراتسياعا قاتىستى تۇبەگەيلى وزگەرىستەر كەرەك ەكەنىن باستى نازارعا الدى. ءوز سوزىندە، قانداستاردىڭ كوشىپ كەلۋىنە جانە ىشكى ميگراتسياعا قاتىستى ساياسات تۇبەگەيلى وزگەرەتىنىن، وسى ورايدا، دەموگرافيالىق جانە ەكونوميكالىق ۇردىستەردى ەسكەرۋ كەرەكتىگىن جەتكىزگەن بولاتىن.
قۇداي اۋىزعا سالعانداي، كاسىبى الدىندا، ءداستۇرى مەن قازاقي رۋحى ءبۇتىن سىرتتاعى قازاقتى، ياعني قانداستارىمىزدى ەلگە مىقتاپ تارتۋ، وتە وزەكتى ماسەلە ەكەنىن قاداپ ايتىلۋدا. سەبەبى، جازيراداي موڭعوليادا B737NG اۋە كولىگىن باسقاراتىن يزينيس ەيرۆەيز كومپانياسى اۋە قوزعالىسىنىڭ ۇشقىشى بەك بازىلحانۇلىنىڭ، فرانتسيانىڭ كورىكتى استاناسى پاريجدەگى ەيفەل مۇناراسىندا ەڭبەك ەتەتىن ايسۇلۋ تولەكتىڭ، نەمەسە شۆەيتساريادا تۇرىپ، Google-دا جۇمىس ىستەيتىن امان وتەمۇراتوۆتاردىڭ ۇلتتىق پوتەنسيالدارى وتە جوعارى.
ءدال وسى يدەيامەن قانداستاردىڭ ماڭىزدىلىعىن پرەزيدەنت جولداۋىندا، «تاعى دا قايتالاپ ايتامىن. ەلىمىزدە ەڭبەكقور ادام، كاسىبي مامان ەڭ سىيلى ادام بولۋعا ءتيىس. وسىنداي ازاماتتار مەملەكەتىمىزدى دامىتادى» دەۋى بەكەر ەمەس.
قازىر ەلىمىزدىڭ سوڭعى ەسەبى بويىنشا، 19 ملن. 666 مىڭنان اسىپ وتىر. جىل باسىنان تامىزعا دەيىن ەلگە كەلگەندەر سانى 9595 ادامدى قۇراعان. ارينە، بۇل سان وتە از. قانداستارمەن تولىققان قازاق سانى 71 پايىزدى عانا قۇراپ وتىر. ءسوزسىز، ءتيىستى اكىمشىلىك شارالارىنىڭ پارمەنى كەرەك.
وسى ۋاقىتقا دەيىن مەملەكەت شەت ەلدەگى اعايىنمەن بەس رەت جالپىقازاق قۇرىلتايىن وتكىزدى. كوشى-قوننىڭ كەلەلى ماسەلەلەرى تالقىلانىپ، تۇيىتكىلدى قارەكەتتەر قولعا الىندى. اسىرەسە، سوڭعى بەس جىلدىقتا «نۇرلى كوش» باعدارلاماسىنىڭ كەلەسى دامۋ كەزەڭى رەتتەلىپ، ارنايى «وتانداستار قورى» قۇرىلدى. ومبىدان باستاپ، ستامبۋل، كيەۆ، بىشكەك، تاشكەنت، بەرلينگە دەيىن مادەني-ىسكەرلىك ورتالىقتارى اشىلدى. البەتتە، وسى باستامالار جالعاسىن تاۋىپ قىتاي مەن يران، اۋعانستان مەن ەۋروداقتا اشىلا بەرسە قۇبا-قۇب بولار ەدى.
ايتپاقشى، اسپان استى قىتاي ەلىندە، «ۇلكەن قىتاي» ۇلتتىق يدەياسى بار. بۇل ءاربىر سىرتتاعى قىتايلىقتىڭ جادىنىندا ساقتالعان يدەيا، الەمدىك دەڭگەيدە ءوزىنىڭ ەكونوميكالىق-الەۋمەتتىك ناتيجەسىن ەسەلەپ بەرۋدە. ماسەلەن، قىتاي ۇكىمەتى شەت ەلگە بىلىممەن، نە ەڭبەك ميگراتسياسىمەن قونىس اۋدارعان ازاماتتارىنا ەرەكشە امانات تاعادى. بارعان ەلىنە سۋداي ءسىڭىپ، تاستاي باتسا دا، ۇلى وتانىنا اقشالاي، نە ساۋدا كەلىسىمدەرىمەن، جاڭا قىتاي كۆارتالدارىن دامىتۋىمەن بولسىن ءوز ۇلەسىن قوسىپ تۇرۋىنا باعىتتايدى. بارلىق قىتايلىق وسى يدەيا نەگىزىندە ءومىر سۇرەدى. بۇنى بايقاۋ قيىن ەمەس، اتاقتى دجەكي چاننىڭ كينولارىن سارالاپ كورسەڭىز دە جەتكىلىكتى.
ءسوز سوڭىنا ايتارىم، وسى كۇندەرى ەلىمىزدىڭ «جاڭا قازاقستان» ۇلتتىق يدەياسىنىڭ كۇنى تۋىپ كەلە جاتىر. ساياسي ارنانىڭ جىلعاسى وسى باعىتتا اعۋدا. وسى رەتتە، تىلەگىمىز بەن نيەتىمىز ءبىر بەيرەسمي سانى 5-7 ميلليوندىق سىرتتاعى قانداستاردى ەلگە تارتىپ، دامۋ جولىندا بىرگە قيمىلداۋى - ەلىمىزدىڭ اناعۇرلىم مەملەكەتتىك بەلەستەرگە اياق باسۋى بولماق.
پرەزيدەنتتىڭ دە جولداۋداعى قانداستار ماسەلەسىنە ايرىقشا باسىمدىق بەرۋى قارقىندى مەملەكەتتىك جۇيەلى قادامداردىڭ ءبىرى رەتىندە باعالانۋى وسىندا.
ماقسات جاقاۋ،
Facebook پاراقشاسىنان
