موڭعوليانىڭ قازاقستانداعى ەلشىلىگىندە قازاقستان عالىمى اقەدىل تويشان مەن ساياساتكەر ورمان نۇرباەۆ ماراپاتتالدى، دەپ حابارلايدى «ادىرنا» ءتىلشىسى BAQ.KZ-كە سىلتەمە جاساپ.
ماراپاتتاۋ سالتاناتىنا موڭعوليادان ارنايى كەلگەن موڭعوليا پرەمەر-ءمينيسترىنىڭ ورىنباسارى سايانبۋيان امارسايحان، قر اقپارات جانە قوعامدىق دامۋ ءمينيسترى دارحان قىدىرالى جانە ەكى ەلدىڭ ءتيىستى مەكەمە قىزمەتكەرلى قاتىستى.
قازاقستان مەن موڭعوليا اراسىنداعى دوستىق قارىم-قاتىناستىڭ 30 جىلدىعىنا وراي ۇيىمداستىرىلعان شارا بارىسىندا قازاقستان ازاماتتارىن ماراپاتتاۋ موڭعوليانىڭ قازاقستانداعى ەلشىلىك عيماراتىندا ءوتتى.
موڭعوليا مەن قازاقستاننىڭ قارىم-قاتىناسىنىڭ دامۋىنا قوسقان زور ۇلەسى ءۇشىن QazaqGeography قوعامىنىڭ اتقارۋشى ديرەكتورى ورمان نۇرباەۆ «التىن جۇلدىز» وردەنىمەن ماراپاتتالسىن. موڭعوليا پرەزيدەنتى ۋ.حۇرەلسۇحتىڭ №124 جارلىعى - دەلىنگەن ماراپاتتاۋ جارلىعىندا.
سونىمەن قاتار حالىقارالىق تۇركى اكادەمياسىنىڭ عىلىمي قىزمەتكەرى، عالىم اقەدىل تويشان موڭعوليا پرەزيدەنتىنىڭ جارلىعىمەن «دوستىق» وردەنىمەن ماراپاتتالدى.
موڭعوليا مەن قازاقستاننىڭ ىنتىماقتاستىعىنىڭ دامۋىنا قوسقان ەلەۋلى ۇلەسى ءۇشىن حالىقارالىق تۇركى اكادەمياسىنىڭ ساراپشىسى، عالىم اقەدىل تويشانۇلى موڭعوليانىڭ «دوستىق» وردەنىمەن ماراپاتتالسىن. موڭعوليا پرەزيدەنتى ۋ.حۇرەلسۇحتىڭ №124 جارلىعى ۇلانباتىر قالاسى 2022 جىلعى شىلدە – دەلىنگەن ماراپاتتاۋ جارلىعىندا.
اقەدىل تويشان – ەتنوگراف، عالىم، فيلولوگيا عىلىمدارىنىڭ كانديداتى. قازاقستان مەن موڭعوليا اراسىنداعى مادەني وكىل. حالىقارالىق تۇركى اكادەمياسىندا ساراپشى، اكادەميانىڭ موڭعوليادا اتقارىلاتىن جۇمىستارىن جان-جاقتى سارالاپ، ۇيلەستىرۋمەن جانە تىلماشتىق قىزمەت اتقارۋمەن اينالىسىپ كەلەدى.
ورمان نۇرباەۆ – 2007-2012 جىلدارى قازاقستاننىڭ موڭعولياداعى ەلشىسى بولىپ ابىرويلى قىزمەت اتقارعان العاشقى ەلشىلەردىڭ ءبىرى.
