Mońǵolııanyń Qazaqstandaǵy elshiliginde Qazaqstan ǵalymy Aqedil Toıshan men saıasatker Orman Nurbaev marapattaldy, dep habarlaıdy «Adyrna» tilshisi BAQ.KZ-ke silteme jasap.
Marapattaý saltanatyna Mońǵolııadan arnaıy kelgen Mońǵolııa Premer-mınıstriniń orynbasary Saıanbýıan Amarsaıhan, QR Aqparat jáne qoǵamdyq damý mınıstri Darhan Qydyráli jáne eki eldiń tıisti mekeme qyzmetkerli qatysty.
Qazaqstan men Mońǵolııa arasyndaǵy dostyq qarym-qatynastyń 30 jyldyǵyna oraı uıymdastyrylǵan shara barysynda Qazaqstan azamattaryn marapattaý Mońǵolııanyń Qazaqstandaǵy elshilik ǵımaratynda ótti.
Mońǵolııa men Qazaqstannyń qarym-qatynasynyń damýyna qosqan zor úlesi úshin QazaqGeography qoǵamynyń atqarýshy dırektory Orman Nurbaev «Altyn juldyz» ordenimen marapattalsyn. Mońǵolııa Prezıdenti Ý.Húrelsúhtiń №124 Jarlyǵy - delingen marapattaý Jarlyǵynda.
Sonymen qatar Halyqaralyq Túrki akademııasynyń ǵylymı qyzmetkeri, ǵalym Aqedil Toıshan Mońǵolııa Prezıdentiniń Jarlyǵymen «Dostyq» ordenimen marapattaldy.
Mońǵolııa men Qazaqstannyń yntymaqtastyǵynyń damýyna qosqan eleýli úlesi úshin Halyqaralyq Túrki akademııasynyń sarapshysy, ǵalym Aqedil Toıshanuly Mońǵolııanyń «Dostyq» ordenimen marapattalsyn. Mońǵolııa Prezıdenti Ý.Húrelsúhtiń №124 Jarlyǵy Ulanbatyr qalasy 2022 jylǵy shilde – delingen marapattaý Jarlyǵynda.
Aqedil Toıshan – etnograf, ǵalym, fılologııa ǵylymdarynyń kandıdaty. Qazaqstan men Mońǵolııa arasyndaǵy mádenı ókil. Halyqaralyq Túrki akademııasynda sarapshy, akademııanyń Mońǵolııada atqarylatyn jumystaryn jan-jaqty saralap, úılestirýmen jáne tilmashtyq qyzmet atqarýmen aınalysyp keledi.
Orman Nurbaev – 2007-2012 jyldary Qazaqstannyń Mońǵolııadaǵy elshisi bolyp abyroıly qyzmet atqarǵan alǵashqy elshilerdiń biri.
