قازاق دالاسىن جاياۋ كەزىپ، ەگدە تارتقان شاعىندا ەرەكشە جول-cاپارعا شىققان سارسەنباي وسپانۇلىنا پاتەر بەرىلدى. بۇل تۋرالى "ادىرنا" ۇلتتىق پورتالى جازدى.
ۇلىتاۋ وبلىسىنىڭ اكىمى عالىمجان قۇسمانعاليدىڭ ءوزى قازاق دالاسىن ارالاعان اقساقالدىڭ مەرەيىن ءوسىرىپ، مەيماناسىن تاسىتقان ءىس-شارا جايىن باياندادى.
"بۇگىن جيھانكەز اقساقالدى وبلىس ورتالىعىندا ماراپاتتادىق. وسى جىلدىڭ 31 ناۋرىزىندا جورىعىن باستاعان 72 جاستاعى سارسەنباي اقساقال 6 ايدا 8 مىڭداي شاقىرىم جەردى جاياۋ ءجۇرىپ ءوتتى. استانادان قاسيەتتى مەككەگە دەيىن 6139 شاقىرىم. دەمەك، ەگەر سارسەنباي اتا مۇسىلماندىق پارىزىن ورىندايمىن دەسە، وندا ارتىعىمەن اتقارار ەدى. ءوزىنىڭ وسى جورىعىن سوڭعى 6 جىل بويى ويلاپ ءجۇرىپتى، جوسپارلاپتى. بۇل دا جاس بۋىنعا ۇلكەن ۇلگى. الدىڭا قويعان ماقساتتان ەشقاشان باس تارتپا. قانشا قيىندىق بولسا دا، اۋىر ساتتەر بولسا دا، العا قاراي جۇرۋگە تالپىنۋ كەرەك. سەبەبى، كەز-كەلگەن ادام شەكسىز مۇمكىندىكتەرگە يە. ۇلكەن كىسىگە ءوزىنىڭ ىسىنە ساي سىي-قۇرمەت كورسەتىلدى. وبلىس اكىمى بەرىك ابدىعاليۇلى باستاماسىمەن، Kazakhmys Corporation-نىڭ قولداۋىمەن جەزقازعان قالاسىنىڭ ورتالىعىندا پاتەر كىلتى تاپسىرىلدى. شاپانى جابىلىپ، ەستەلىك سىيلىقتار بەرىلدى. اتامىز ءجۇز جاساسىن!", - دەپ ىستىق ىقىلاسىن ءبىلدىردى اۆتور.
ەسكەرىڭىزگە سالا كەتەيىك، "ادىرنا" ۇلتتىق پورتالى سارسەنباي اقساقالدىڭ جانكەشتى جولساپارى جايلى بۇرىن دا جازعان ەدى. تابيعاتىنان شيراق، تىڭ، اقيكوز اقساقال ەندى الدىڭعى ازيا مەن ەۋروپانى، اقش پەن موڭعولياعا تابان تىرەپ، اتالعان ەلدەردى جاياۋ ارالاۋدى جوسپارلاپ وتىر.
"ادىرنا" ۇلتتىق پورتالى
