3 قىركۇيەك كۇنى اكادەميادا قازاقتىڭ تۇڭعىش حالىق ءارتىسى، كاسىبي رەجيسسەرى، دراماتۋرگ جۇمات ءشانيننىڭ نەمەرەسى جاننا شانينامەن ەسكە الۋ كەزدەسۋى ءوتتى. اتالمىش شارانى «ادىرنا» ۇلتتىق-ەتنوگرافيالىق بىرلەستىگى الماتى قالاسى ىشكى ساياسات باسقارماسىنىڭ تاپسىرىسى اياسىندا “تاريحتان تاعىلىم” جوباسى نەگىزىندە ۇيىمداستىرىلدى. بيىل جۇمات ءشانيننىڭ تۋعانىنا 125 جىل تولدى.
«ءبىز ءسوز ەتكەلى وتىرعان مەنىڭ اتام جۇمات شانين ەلىنىڭ رۋح كەرۋەنىن باستاعان ءبىرتۋار ازامات ەدى. ول «حالىق جاۋى» دەگەن جالامەن ادىلەتسىز ساياساتتىڭ قۇربانى بولدى. ەڭ اۋىر وكىنىش – حالقىنا ادال قىزمەت ەتكەن ۇلىن – مەنىڭ اتامدى «حالىق جاۋى» دەگەن جالامەن بۇكىل اۋلەتىمىز ايىپتالىپ، ءبىرى وڭتۇستىككە، ءبىرى سولتۇستىككە بىتىراي قاشقان. «سپەكتاكلدى 10 مينۋتقا ادەيى كەش باستادى، ستالينگە قاستاندىق جاساماق بولدى» دەگەن جالا جابىلىپ، اتىلىپ كەتتى. نكۆد-نىڭ جەندەتتەرى «شانين جۇمات، ساكەن سەيفۋللين، تەمىربەك جۇرگەنوۆ ادەيىلەپ ماسكەۋدە قويعان «قىز جىبەك» سپەكتاكلىنىڭ اشىلۋىن كەشىكتىردىڭدەر. ۇشەۋىڭ ي.ۆ.ستالينگە قاساقانا قاستاندىق جاساعىلارىڭ كەلگەن ەكەن عوي!» دەپتى. ولاردى ماجبۇرلەپ «سپەكتاكلگە كەشىگۋىمىزدىڭ سەبەبى ۇشەۋىمىز سول ون مينۋتتىڭ ىشىندە ەكىنشى قاباتقا كوتەرىلىپ، ءستاليندى اتىپ كەتپەكشى بولدىق» دەپ «تۇسىنىكتەمە» جازدىرادى... ارتىنشا الماتىدا اتۋ جازاسىنا كەسىلدى. تەك ارادا جيىرما جىل وتكەندە اتامنىڭ ءىسى اقتالىپ شىقتى». بۇل تۋرالى جانە شانيندەر اۋلەتى جايلى قوعام قايراتكەرى، پەداگوگ جاننا شانينا وكىنىشپەن ەسكە الدى. سونداي-اق، ادەبيەتتانۋشى عالىم رىمعالي نۇرعاليەۆتىڭ ۇلى تۇلعانىڭ شىعارماشىلىعى مەن ءومىرى جايلى جازىلعان «ارقالىق باتىر» كىتابى جايلى ستۋدەنتتەرگە كەڭىنەن اڭگىمەلەدى. ايتا كەتۋ كەرەك، «ارقالىق باتىر» پەساسىن جازۋمەن شەكتەلمەي، ساحنالاعان رەجيسسەرى دە ج.شانيننىڭ ءوزى بولدى. ءوزى ارقالىق باتىردى سومداي وتىرىپ، كاسىبي ساحنانىڭ ءدامىن تاتپاعان، ەل ىشىنەن جينالعان اكتەرلەردى ەل اراسىنان جينادى. ءتىپتى پەسادا ەر ادامدار ايەلدىڭ كەيپىن گريممەن كەلتىرىپ ايەل ءرولىن ويناپ شىققان كەزدە كورەرمەندەر قاتتى ءتانتى بولعانىن ەرەكشە تەبىرەنىسپەن ايتتى.
تۇلپاردىڭ تۇياعى، اسىلدىڭ سىنىعى جاننا شانينا ۇزاق جىلدار بويى مەكتەپتە ۇستازدىق ەتۋدەن باستاپ ديرەكتور قىزمەتىن اتقارىپ كەلگەن قوعام قايراتكەرلەرىنىڭ قاتارىندا. وسىناۋ قازاق ونەرىنە ولشەۋسىز ۇلەس قوسقان ءىرى تۇلعانىڭ تاعىلىمىن ستۋدەنتتەرگە ونەگە تۇتۋعا، قازاق ونەرىن ناسيحاتتاۋعا تىلەك ءبىلدىردى. بۇگىندە ەسىمى اقتالىپ، قازاق ەلىنىڭ ارداقتى ۇلىنا اينالدى. وسى قۋانىشىن جاسىرا الماعان اپاي ءتۇرلى تاتتىلەرمەن شاشۋ شاشتى.
