3 qyrkúıek kúni Akademııada Qazaqtyń tuńǵysh halyq ártisi, kásibı rejısseri, dramatýrg Jumat Shanınniń nemeresi Janna Shanınamen eske alý kezdesýi ótti. Atalmysh sharany «Adyrna» ulttyq-etnografııalyq birlestigi Almaty qalasy Ishki saıasat basqarmasynyń tapsyrysy aıasynda “Tarıhtan taǵylym” jobasy negizinde uıymdastyryldy. Bıyl Jumat Shanınniń týǵanyna 125 jyl toldy.
«Biz sóz etkeli otyrǵan meniń atam Jumat Shanın eliniń rýh kerýenin bastaǵan birtýar azamat edi. Ol «halyq jaýy» degen jalamen ádiletsiz saıasattyń qurbany boldy. Eń aýyr ókinish – halqyna adal qyzmet etken ulyn – meniń atamdy «halyq jaýy» degen jalamen búkil áýletimiz aıyptalyp, biri ońtústikke, biri soltústikke bytyraı qashqan. «Spektakldi 10 mınýtqa ádeıi kesh bastady, Stalınge qastandyq jasamaq boldy» degen jala jabylyp, atylyp ketti. NKVD-nyń jendetteri «Shanın Jumat, Sáken Seıfýllın, Temirbek Júrgenov ádeıilep Máskeýde qoıǵan «Qyz Jibek» spektakliniń ashylýyn keshiktirdińder. Úsheýiń I.V.Stalınge qasaqana qastandyq jasaǵylaryń kelgen eken ǵoı!» depti. Olardy májbúrlep «spektaklge keshigýimizdiń sebebi úsheýimiz sol on mınýttyń ishinde ekinshi qabatqa kóterilip, Stalındi atyp ketpekshi boldyq» dep «túsinikteme» jazdyrady... Artynsha Almatyda atý jazasyna kesildi. Tek arada jıyrma jyl ótkende atamnyń isi aqtalyp shyqty». Bul týraly jáne Shanınder áýleti jaıly qoǵam qaıratkeri, pedagog Janna Shanına ókinishpen eske aldy. Sondaı-aq, ádebıettanýshy ǵalym Rymǵalı Nurǵalıevtiń Uly tulǵanyń shyǵarmashylyǵy men ómiri jaıly jazylǵan «Arqalyq batyr» kitaby jaıly stýdentterge keńinen áńgimeledi. Aıta ketý kerek, «Arqalyq batyr» pesasyn jazýmen shektelmeı, sahnalaǵan rejısseri de J.Shanınnyń ózi boldy. Ózi Arqalyq batyrdy somdaı otyryp, kásibı sahnanyń dámin tatpaǵan, el ishinen jınalǵan akterlerdi el arasynan jınady. Tipti pesada er adamdar áıeldiń keıpin grımmen keltirip áıel rólin oınap shyqqan kezde kórermender qatty tánti bolǵanyn erekshe tebirenispen aıtty.
Tulpardyń tuıaǵy, asyldyń synyǵy Janna Shanına uzaq jyldar boıy mektepte ustazdyq etýden bastap dırektor qyzmetin atqaryp kelgen qoǵam qaıratkerleriniń qatarynda. Osynaý qazaq ónerine ólsheýsiz úles qosqan iri tulǵanyń taǵylymyn stýdentterge ónege tutýǵa, qazaq ónerin nasıhattaýǵa tilek bildirdi. Búginde esimi aqtalyp, qazaq eliniń ardaqty ulyna aınaldy. Osy qýanyshyn jasyra almaǵan apaı túrli táttilermen shashý shashty.
