پرەزيدەنتتىڭ كەشەگى "ۇيىم قۇرايىق' دەگەنىن، ءوز باسىم، "رۋسسكي ءميردىڭ" باستى قارۋى سانالاتىن ورىس ءتىلىن —الەمدىك دەڭگەيدەگى ساياسي ارەنادان شىعارىپ، پۋتين كومانداسىنىڭ پوزيتسيالارىن السىرەتۋ ءۇشىن جاسالعان ساياسي قادام دەپ ءتۇسىندىم.
مەنىڭ ويىمشا بۇل قادامنان كەيىن، "رۋسسكي ءميردىڭ" جىندىلارى، ەەە ءتىلىمىزدى تىستەپ جاتىر، ءۇيتىپ—جاتىر، ءسۇيتىپ جاتىر دەپ، كورشىلەرگە كوز الارتا المايدى. ياعني، توقاەۆ "مەملەكەتارالىق" دەڭگەيدە ورىن الۋى مۇمكىن دەلىنەتىن ۇلكەن ءبىر كونفليكتىڭ بەتىن قايىرىپ، سالدارىنىڭ ءبىرىن شارانادا جاتقان جەرىنەن بۋىندىرماققا قادام جاسادى دەپ ويلايمىن.
نە بولسادا ۋكراينامەن بولىپ جاتقان سوعىس، رەسەيدىڭ بارىنشا السىرەۋىنە اكەلىپ سوققانىن كۇتۋ كەرەك. دوپتى قاتتىراق ۇرساڭ، قاتتىراق ۇشادى دەمەكشى، كەرەك كەزدە وتىرىك ماقتاي ساپ، وگىزدى وتكىزىپ العانعا دەيىن ايۋدى سيپاي تۇرعاندا ءجون. سايقال ساياسات دەگەن وسى اۋ شاماسى.
ونىڭ ۇستىنە، بۇل ارەكەت، حالقىمنىڭ قازاق تىلىنە دەگەن سۇرانىسىن، ىنتاسىن ارتتىرىپ، اشىندىرىپ— ءتىلىمىزدىڭ دەڭگەيىن كوتەرىپ جىبەرەتىن زور مۇمكىندىكتىڭ ءبىرى. جاقىن ارادا، تارازى باسىن تەڭەستىرىپ جىبەرۋگە سەبى تيەر قازاق ءتىلىن قولدايتىن ۇيىمنىڭدا قۇرىلىپ كەتۋى عاجاپ ەمەس. قۇرۋ كەرەك. قىسقاسى، ورىس ءتىلىن قولدايتىن ۇيىم جايلى نە ويلايسىڭ، پىكىرىڭ قانداي دەگەن ءۇش— ءتورت ادامعا وسىلاي جاۋاپ بەردىم. ال بۇل تۇرعىدا ءسىزدىڭ پىكىرىڭىز قانداي؟
تەرىسكەي كوشىنە جاۋاپ بەرەتىن "TAUEKEL" ۇيىمىنىڭ ءامىرى رەتىندە، بولاشاقتا، كوش ارقىلى تەرىسكەيدەگى قازاقي يدەولوگيانىڭ ءباسىن كوتەرىپ، مەرەيىن تاسىتامىز دەگەن تاريحي ىسىمىزگە قولدان جاسالعان كەدەرگىلەر كەلتىرىلمەس ءۇشىن، بيلىكتىڭ كەيبىر شەشىمدەرىنە باسقا كوزقاراسپەن قاراپ، ءتۇسىنىپ، ساناسۋعا ءماجبۇرمىن. ياعني، سەن ساياساتپەن ويناماساڭ، ساياسات سەنىمەن وينايدى دەمەكشى، مەنىكىدە ساياسات. ساياساتتى ويلاماعان قازاقتى، قازاقتى ويلامايتىن ساياساتكەر باسقارادى.
"ادىرنا" ۇلتتىق پورتالى
