شىمكەنت قالاسىنىڭ اكىمى مۇرات ايتەنوۆ حالىقارالىق قارتتار كۇنىنە وراي، اعا ۇرپاققا قۇرمەت كورسەتىپ، سىي-سياپات جاسادى. جىلداعى داستۇرگە ساي “ميلليونەر” مەيرامحاناسىندا قارتتارعا داستارحان جايىپ، ءومىر جولدارى مەن ەل ءۇشىن جاساعان ەڭبەكتەرىن ۇلىقتادى.
ارنايى مەرەكەلىك كونتسەرت ۇيىمداستىرىلىپ، ءان-كۇيدەن شاشۋ شاشىلدى. قالا اكىمىنىڭ سىيلىقتارى تابىستالدى.
سونىمەن قاتار، ءوڭىردىڭ الەۋمەتتىك-ەكونوميكالىق، اسىرەسە قوعامدىق-ساياسي ءومىرىنىڭ دامۋىنا قوسقان ۇلەستەرى ءۇشىن بىرقاتار ارداگەرلەر قاۋىمى ماراپاتتالدى.
شاھار باسشىسى م.ايتەنوۆ اتاۋلى مەرەكەدە ەل ءۇشىن ەتكەن ەسەلى ەڭبەكتەرىنىڭ ارقاسىندا ايماعىمىزدىڭ ايتۋلى تۇلعالارىنا اينالعان يسمات تۇرسىنقۇلۇلىنا، وستەمىر تىلەگەنۇلىنا، الدانازار قۇرمانباەۆقا، ابىلقاسىم دوسبولوۆقا، دوسىباي شەرىمقۇلوۆقا “قۇرمەتتى ارداگەر”، بولاتحان ەرمەكباەۆقا “قۇرمەتتى قۇرىلىسشى” اتاعىن، ال ۇلىقپان باشەنوۆ، اسىلبەك توقماعانبەتوۆ، باستاربەك بايجانوۆقا “قۇرمەت بەلگىسى” توسبەلگىلەرىن تابىستادى.
ء“وڭىرىمىزدىڭ ورىستەپ، كوشىمىزدىڭ ورگە باسىپ، وركەن جايۋ جولىنداعى ارقايسىلارىڭىزدىڭ ەرەن ەڭبەكتەرىڭىزدىڭ ارقاسىندا، ال بۇگىنگى جارقىن جەتىستىكتەرىمىز سىزدەردىڭ تىنىم تاپپاي اتقارعان جۇمىستارىڭىزدىڭ جەمىسى دەپ بىلەمىن.
«اۋىلىڭدا اقساقالدى قاريا بولسا – جازۋلى تۇرعان حاتپەن تەڭ»، – دەگەن بابالار دانالىعىن ءومىر تىرشىلىگىنە بيىك مۇرات ەتكەن حالقىمىزدىڭ بۇگىنگى ۇرپاعى قاي كەزەڭدە دە ۇلكەندى ۇلىق تۇتىپ، كىشىگە ۇلاعات قالدىرعان.
سىزدەردىڭ باي تاجىريبەلەرىڭىزدى جوعارى باعالايمىز. تاباندى ەڭبەكتەرىڭىزگە العىس بىلدىرە وتىرىپ، ومىرلىك تاجىريبەلەرىڭىز بەن اقىل-كەڭەستەرىڭىزگە باس يەمىز”،-دەدى قالا اكىمى م.ايتەنوۆ.
ايتا كەتەيىك، بۇگىندە شىمكەنت قالاسىندا 84 844 زەينەتكەر، سونىڭ ىشىندە 5 ۇوس ارداگەر، 2390 تىل ەڭبەككەرلەرى بار.
