Shymkent qalasynyń ákimi Murat Áıtenov Halyqaralyq qarttar kúnine oraı, aǵa urpaqqa qurmet kórsetip, syı-sııapat jasady. Jyldaǵy dástúrge saı “Mıllıoner” meıramhanasynda qarttarǵa dastarhan jaıyp, ómir joldary men el úshin jasaǵan eńbekterin ulyqtady.
Arnaıy merekelik konert uıymdastyrylyp, án-kúıden shashý shashyldy. Qala ákiminiń syılyqtary tabystaldy.
Sonymen qatar, óńirdiń áleýmettik-ekonomıkalyq, ásirese qoǵamdyq-saıası ómiriniń damýyna qosqan úlesteri úshin birqatar ardagerler qaýymy marapattaldy.
Shahar basshysy M.Áıtenov ataýly merekede el úshin etken eseli eńbekteriniń arqasynda aımaǵymyzdyń aıtýly tulǵalaryna aınalǵan Ismat Tursynqululyna, Óstemir Tilegenulyna, Aldanazar Qurmanbaevqa, Ábilqasym Dosbolovqa, Dosybaı Sherimqulovqa “Qurmetti ardager”, Bolathan Ermekbaevqa “Qurmetti qurylysshy” ataǵyn, al Ulyqpan Bashenov, Asylbek Toqmaǵanbetov, Bastarbek Baıjanovqa “Qurmet belgisi” tósbelgilerin tabystady.
“Óńirimizdiń óristep, kóshimizdiń órge basyp, órken jaıý jolyndaǵy árqaısylaryńyzdyń eren eńbekterińizdiń arqasynda, al búgingi jarqyn jetistikterimiz sizderdiń tynym tappaı atqarǵan jumystaryńyzdyń jemisi dep bilemin.
«Aýylyńda aqsaqaldy qarııa bolsa – jazýly turǵan hatpen teń», – degen babalar danalyǵyn ómir tirshiligine bıik murat etken halqymyzdyń búgingi urpaǵy qaı kezeńde de úlkendi ulyq tutyp, kishige ulaǵat qaldyrǵan.
Sizderdiń baı tájirıbelerińizdi joǵary baǵalaımyz. Tabandy eńbekterińizge alǵys bildire otyryp, ómirlik tájirıbelerińiz ben aqyl-keńesterińizge bas ıemiz”,-dedi qala ákimi M.Áıtenov.
Aıta keteıik, búginde Shymkent qalasynda 84 844 zeınetker, sonyń ishinde 5 UOS ardager, 2390 tyl eńbekkerleri bar.
