مۇرات ايتەنوۆ ارداگەرلەردى قارتتار كۇنىمەن قۇتتىقتادى

698
Adyrna.kz Telegram

1 قازان - حالىقارالىق قارتتار كۇنى. مەرەكە قارساڭىندا شىمكەنت قالاسىنىڭ اكىمى م. ايتەنوۆ ەلىمىز بەن شاھاردىڭ دامۋى جولىندا ەلەۋلى ۇلەس قوسقان بىرنەشە ارداگەردىڭ ۇيىنە بارىپ، ارنايى قۇتتىقتادى. ولارعا قۇرمەت كورسەتىپ، ەستەلىك سىيلىقتار تارتۋ ەتتى.

قالا باسشىسى العاشقى قۇتتىقتاۋىن ەڭبەك ارداگەرى احمەتوۆا رايسا رايىمبەكقىزىنىڭ شاڭىراعىنان باستادى. ارداگەر ۇستازبەن اڭگىمەلەسكەن مۇرات ايتەنوۆ مەرەكە يەسىنە ۇزاق عۇمىر، مىقتى دەنساۋلىق تىلەدى.

احمەتوۆا رايسا رايىمبەكقىزى شىمكەنت قالالىق كومسومول كوميتەتىنىڭ حاتشىسىنان وڭتۇستىك قازاقستان وبلىسى حالىق اعارتۋ ءبولىمىنىڭ مەڭگەرۋشىسى قىزمەتىنە دەيىن اتقارعان. ۇزاق جىلدار حالىق دەپۋتاتتارى قالالىق كەڭەسىنىڭ دەپۋتاتى بولىپ سايلاندى. «قۇرمەت بەلگىسى» وردەنى مەن «قازسسر ءبىلىم بەرۋ ءىسىنىڭ ۇزدىگى» اتاعىنىڭ يەگەرى.

قۇتتىقتاۋ لەگى «قۇرمەت بەلگىسى»، «ەڭبەك قىزىل تۋ» وردەندەرىنىڭ يەگەرى گۋلۋجيگان بايگارينانىڭ وتباسىندا جالعاستى.  ەڭبەك ارداگەرىن  مەرەيلى مەرەكەمەن قۇتتىقتاعان قالا باسشىسى گۋلۋجيگان  ابدۋلاجانقىزىنا دا زور دەنساۋلىق، ۇزاق ءومىر، وتباسىنا باق پەن بەرەكە تىلەپ، ءۇيدىڭ وتاعاسى - ءشامىل اتاعا شاپان جاپتى.

بايگارينا گۋلۋجيگان ابدۋلاجانوۆنا 1937 جىلى كوپ بالالى وتباسىندا دۇنيەگە كەلگەن. ەڭبەك جولىن تىگىن مامانىنان باستاپ، 1975-1987 ج.ج. «ۆوسحود» تىگىن بىرلەستىگىنىڭ باس ينجەنەرى كەيىن باس ديرەكتورى بولادى. ال 1991 جىلى «ۆوسحود» ااق شف پرەزيدەنتى بولىپ تاعايىندالىپ، وسى سالانىڭ دامۋىنا زور ۇلەس قوسادى. ۇزاق جىلعى ەڭبەگى اقتالىپ، وعان قازاقستاننىڭ جەڭىل ونەركاسىبىن دامىتقانى ءۇشىن «قازاقستان ونەركاسىبىنىڭ ەڭبەك سىڭىرگەن قايراتكەرى» قۇرمەتتى اتاعى بەرىلەدى.

ءوز كەزەگىندە ارداگەرلەر دە قۇرمەت كورسەتىپ، كىشىلىك ىزەتىن جاساعان شاھار باسشىسىنا العىسىن جاۋدىرىپ، قازاقستاندىقتار ءۇشىن بەيبىت تە بەرەكەلى ءومىر تىلەدى.

 

پىكىرلەر