Murat Áıtenov ardagerlerdi qarttar kúnimen quttyqtady

699
Adyrna.kz Telegram

1 qazan - Halyqaralyq qarttar kúni. Mereke qarsańynda Shymkent qalasynyń ákimi M. Áıtenov elimiz ben shahardyń damýy jolynda eleýli úles qosqan birneshe ardagerdiń úıine baryp, arnaıy quttyqtady. Olarǵa qurmet kórsetip, estelik syılyqtar tartý etti.

Qala basshysy alǵashqy quttyqtaýyn eńbek ardageri Ahmetova Raısa Raıymbekqyzynyń shańyraǵynan bastady. Ardager ustazben áńgimelesken Murat Áıtenov mereke ıesine uzaq ǵumyr, myqty densaýlyq tiledi.

Ahmetova Raısa Raıymbekqyzy Shymkent qalalyq komsomol komıtetiniń hatshysynan Ońtústik Qazaqstan oblysy halyq aǵartý bóliminiń meńgerýshisi qyzmetine deıin atqarǵan. Uzaq jyldar halyq depýtattary qalalyq Keńesiniń depýtaty bolyp saılandy. «Qurmet belgisi» ordeni men «QazSSR bilim berý isiniń úzdigi» ataǵynyń ıegeri.

Quttyqtaý legi «Qurmet Belgisi», «Eńbek Qyzyl Tý» ordenderiniń ıegeri Gýlýjıgan Baıgarınanyń otbasynda jalǵasty.  Eńbek ardagerin  mereıli merekemen quttyqtaǵan qala basshysy Gýlýjıgan  Abdýlajanqyzyna da zor densaýlyq, uzaq ómir, otbasyna baq pen bereke tilep, úıdiń otaǵasy - Shámil ataǵa shapan japty.

Baıgarına Gýlýjıgan Abdýlajanovna 1937 jyly kóp balaly otbasynda dúnıege kelgen. Eńbek jolyn tigin mamanynan bastap, 1975-1987 j.j. «Voshod» tigin birlestiginiń bas ınjeneri keıin bas dırektory bolady. Al 1991 jyly «Voshod» AAQ ShF Prezıdenti bolyp taǵaıyndalyp, osy salanyń damýyna zor úles qosady. Uzaq jylǵy eńbegi aqtalyp, oǵan Qazaqstannyń jeńil ónerkásibin damytqany úshin «Qazaqstan ónerkásibiniń eńbek sińirgen qaıratkeri» qurmetti ataǵy beriledi.

Óz kezeginde ardagerler de qurmet kórsetip, kishilik izetin jasaǵan shahar basshysyna alǵysyn jaýdyryp, qazaqstandyqtar úshin beıbit te berekeli ómir tiledi.

 

Pikirler