«شىمكەنت قالاسىندا 84 844 زەينەتكەر بار. ونىڭ 5-ەۋى ۇلى وتان سوعىسى ارداگەرى بولسا، 2390-ى تىل ارداگەرى. سونىمەن قاتار، قالامىزدا 55 859 كوپ بالالى انا تۇرادى. ونىڭ ىشىندە «التىن القا»، «كۇمىس القا» بەلگىسىنىڭ يەگەرلەرى 11 266-نى قۇراپ وتىر». بۇل تۋرالى شىمكەنت قالالىق جۇمىسپەن قامتۋ جانە الەۋمەتتىك قورعاۋ باسقارماسىنىڭ باسشىسى ب.ناربەكوۆا حالىقارالىق قارتتار كۇنى قارساڭىندا وتكەن بريفينگتە مالىمدەدى.
شىمكەنتتىڭ ءار اۋدانىندا «بەلسەندى ۇزاق ءومىر» ورتالىعىنىڭ بولىمشەلەرى اشىلىپ، زەينەت جاسىنداعى ازاماتتارعا 4 ساعاتتتتان ەكى اۋىسىمدا تەگىن ارناۋلى الەۋمەتتىك قىزمەت كورسەتىپ كەلەدى.
— حالىقارالىق قارتتار كۇنى قارساڭىندا زەينەتكەرلەردى ساۋىقتىرۋعا ارنالعان تاعى ءبىر «بەلسەندى ۇزاق ءومىر» ورتالىعىنىڭ بولىمشەسى سالتاناتتى تۇردە اشىلماق. قاراتاۋ اۋدانىنا قاراستى جىبەك جولى كوشەسىندە ورنالاسقان ورتالىق 4 ساعاتتان ەكى اۋىسىمدا 150 كىسىگە دەيىن قىزمەت كورسەتۋگە بەيىمدەلگەن. سونىمەن قاتار، ورتالىقتا دارىگەرلىك تەكسەرۋ، بيليارد، تەننيس، ساداق اتۋ، ART تەراپيا، ينەمەن ەمدەۋ، ەڭبەك تەراپياسى، باسسەين سىندى كوپتەگەن ەمدىك جاتتىعۋلار قاراستىرىلعان، - دەدى بالمارجان پولاتقىزى.
مامانداردىڭ ايتۋىنشا، زەينەت جاسىنداعى 9238 ازاماتتى ساناتورلىق ەمدەۋدى قامتاماسىز ەتۋ قاراستىرىلعان. تامىز ايىنىڭ قورىتىندىسىنا سايكەس، 2040 كىسى شيپاجايدا ەم العان. سونىمەن قاتار، 2500 ارداگەرگە رەسپۋبليكالىق، وبلىستىق جانە قالالىق مەرزىمدى باسىلىمدارعا تەگىن جازىلىم ۇيىمداستىرىلعان.
ايتا كەتەيىك، مەرەكە قارساڭىندا قالانىڭ دامۋىنا ەڭبەگى سىڭگەن ارداگەرلەر مەن قارتتاردى قۇتتىقتاپ، سىي-سياپات تابىستاۋ جوسپارلانعان.
