«Shymkent qalasynda 84 844 zeınetker bar. Onyń 5-eýi Uly Otan soǵysy ardageri bolsa, 2390-y tyl ardageri. Sonymen qatar, qalamyzda 55 859 kóp balaly ana turady. Onyń ishinde «Altyn alqa», «Kúmis alqa» belgisiniń ıegerleri 11 266-ny qurap otyr». Bul týraly Shymkent qalalyq jumyspen qamtý jáne áleýmettik qorǵaý basqarmasynyń basshysy B.Narbekova halyqaralyq qarttar kúni qarsańynda ótken brıfıngte málimdedi.
Shymkenttiń ár aýdanynda «Belsendi uzaq ómir» ortalyǵynyń bólimsheleri ashylyp, zeınet jasyndaǵy azamattarǵa 4 saǵattttan eki aýysymda tegin arnaýly áleýmettik qyzmet kórsetip keledi.
— Halyqaralyq qarttar kúni qarsańynda zeınetkerlerdi saýyqtyrýǵa arnalǵan taǵy bir «Belsendi uzaq ómir» ortalyǵynyń bólimshesi saltanatty túrde ashylmaq. Qarataý aýdanyna qarasty Jibek joly kóshesinde ornalasqan ortalyq 4 saǵattan eki aýysymda 150 kisige deıin qyzmet kórsetýge beıimdelgen. Sonymen qatar, ortalyqta dárigerlik tekserý, bılıard, tennıs, sadaq atý, ART terapııa, ınemen emdeý, eńbek terapııasy, basseın syndy kóptegen emdik jattyǵýlar qarastyrylǵan, - dedi Balmarjan Polatqyzy.
Mamandardyń aıtýynsha, zeınet jasyndaǵy 9238 azamatty sanatorlyq emdeýdi qamtamasyz etý qarastyrylǵan. Tamyz aıynyń qorytyndysyna sáıkes, 2040 kisi shıpajaıda em alǵan. Sonymen qatar, 2500 ardagerge respýblıkalyq, oblystyq jáne qalalyq merzimdi basylymdarǵa tegin jazylym uıymdastyrylǵan.
Aıta keteıik, mereke qarsańynda qalanyń damýyna eńbegi sińgen ardagerler men qarttardy quttyqtap, syı-sııapat tabystaý josparlanǵan.
