بۇگىن قالا اكىمى م.ايتەنوۆ قوناەۆ داڭعىلى بويىندا بوي تىكتەيتىن «Shymkent Tower» ساۋدا-ىسكەرلىك ورتالىعىنىڭ قۇرىلىسىنىڭ باستالۋىنا وراي ۇيىمداستىرىلعان ءىس-شاراعا قاتىستى.
بۇل جوبانىڭ نەگىزگى ينۆەستورى “ساۋتس-ويل” كومپانياسى، ال قۇرىلىسىن سالۋشى باس مەردىگەر «Koç Construction».
“الداعى 5 جىل ىشىندە قالاعا 5 ملرد اقش دوللارى كولەمىندە ينۆەستيتسيا تارتۋ مىندەتىن قويدىق. ال بۇگىن شىمكەنت قالاسى ءۇشىن بىرەگەي جوبا باستاۋ الادى. باستاماعا ساتتىلىك تىلەيمىن. جالپى قازىرگى كەزدە مەگاپوليستە تۇرعىن ۇيگە دەگەن سۇرانىس ارتقان، اگلومەراتسياسى دامىعان شاھارىمىزعا كەلۋشىلەر مەن ءۇي الىپ قويۋعا نيەتتىلەر كوبەيگەن. سوندىقتان كاسىپكەرلەردى شىمكەنتكە ينۆەستيتسيا سالۋعا شاقىرامىن،”-دەدى شاھار باسشىسى م.ايتەنوۆ.
س.سەيتجانوۆ جاڭا نىساننىڭ سالىنۋى - ەكونوميكا مەن قالا كوركىنە كورىك قوساتىنىنا سەنىم بىلدىرە كەلە، "بۇگىنگى شاراعا ارنايى كەلىپ قاتىسقانىڭىز ءۇشىن العىس بىلدىرەمىن، قۇرمەتتى مۇرات دۇيسەنبەكۇلى! وسى كۇنگە دەيىن اكىمدىكپەن تىعىز جۇمىس ىستەپ كەلەمىز، الداعى ۋاقىتتا دا قالامىزدىڭ دامۋى جولىندا بىرگە كوپتەگەن جوبالاردى جۇزەگە اسىراتىن بولامىز",-دەدى.
ال «Koç Construction» - حالىقارالىق قۇرىلىس سالاسىنداعى تاجىريبەلى كومپانيا. جارتى عاسىرلىق تاريحى بار. 1959 جىلدان بەرى 3 ماتەريكتە قۇرىلىس سالىپ، الەمنىڭ 9 ەلىندە ءىرى-ءىرى جوبالاردىڭ جۇزەگە اسۋىنا اتسالىسقان.
سولاردىڭ ءبىرى - كورشى وزبەكستان ەلىنىڭ ەڭ ماڭىزدى جوباسى سانالعان “تاشكەنت سيتي” قۇرىلىسىنىڭ نەگىزگى باسىم بولىگىن جۇرگىزىپ، قازىرگى تاڭدا 3,5 ملن2 م شاماسىنداعى نىساننىڭ قۇرىلىسىن سالۋدا. سونىمەن قوسا «Hilton» قوناق ءۇيىنىڭ قۇرىلىسىن دا اتالمىش كومپانيا جۇرگىزگەن. بۇدان باسقا دا جەتىستىكتەرىن ايتىپ وتكەن كومپانيا ديرەكتورى ومەر ساريكوچ “ورتا ازياداعى اۋماعى ەڭ ۇلكەن بولىپ تابىلاتىن باۋىرلاس ەلىمىز - قازاقستاندا العاشقى ينۆەستيتسيالاۋدى ميلليوندى قالا - شىمكەنتتەن باستاعانىمىزعا وتە قۋانىشتىمىز. بۇل عيمارات پروگرەستىڭ، دامۋدىڭ، ياعني العا قاراي ۇمتىلۋدىڭ نەگىزگى سيمۆولى بولادى. شىم شاھارعا الداعى ۋاقىتتا دا باسقا سالالار بويىنشا ينۆەستيتسيا سالۋعا دايىنبىز”-دەپ اتاپ ءوتتى.
جالپى شىمكەنت قالاسى 2020 جىلى نەگىزگى كاپيتالعا باعىتتالعان ينۆەستيتسيالار كولەمىنىڭ ءوسۋ كورسەتكىشى بويىنشا رەسپۋبليكادا ەكىنشى ورىندا بولعان بولسا، 2021 جىلدان باستاپ قازىرگى ۋاقىتقا دەيىن قازاقستان وڭىرلەرىنىڭ رەيتينگىسىندە تۇراقتى تۇردە كوش باستاپ كەلەدى.
ايتىپ وتەيىك، «Shymkent Tower» ساۋدا-ىسكەرلىك ورتالىعىن سالۋ بارىسىندا 200 تۇراقتى جانە 1250 ۋاقىتشا جۇمىس ورنى اشىلماق.
