شىمكەنت قالاسىندا قر اقپارات جانە قوعامدىق دامۋ مينيسترلىگىنىڭ تاپسىرىسىمەن قازاقستاندىق قوعامدىق دامۋ ينستيتۋتىنىڭ ۇيىمداستىرۋمەن «Ruh camp» كوشپەلى وقىتۋ سەمينارى ءوتىپ جاتىر. سەمينارعا قىزىلوردا، تۇركىستان وبلىستارى مەن شىمكەنت قالاسىنىڭ يدەولوگيا سالاسىنا جاۋاپتى جەرگىلىكتى اتقارۋشى ورگاندارىندا جۇمىس ىستەيتىن 30-دان استام قىزمەتكەر قاتىسۋدا. ولارعا تانىمال كوۋچ جاتتىقتىرۋشىلار، رەسپۋبليكالىق ساراپشىلار قاۋىمداستىعىنىڭ وكىلدەرى مەن ينستيتۋت قىزمەتكەرلەرى ءدارىس وتەدى.
وقىتۋ سەمينارى قىزمەتكەرلەردىڭ كوممۋنيكاتيۆتىك قاسيەتتەرى، اناليتيكالىق داعدىلارى مەن سىني ويلاۋ قابىلەتتەرىنىڭ دامۋىنا، اۋقىمدى دەرەكتەرمەن جۇمىس ىستەۋدىڭ جاڭا ءادىس-تاسىلدەرىن مەڭگەرۋگە، جەرگىلىكتى اتقارۋشى ورگاندار قىزمەتكەرلەرىنىڭ بىلىكتىلىگىنىڭ ارتۋىنا جانە باق سالاسىندا ساپالى اقپاراتتىق-يميدجدىك سۇيەمەلدەۋدى قامتاماسىز ەتۋگە مۇمكىندىك بەردى.
وقىتۋ سەمينارىن «Data Insight» تاۋەلسىز اگەنتتىگىنىڭ جانە Dataisight Academy ونلاين مەكتەبىنىڭ ديرەكتورى، الەۋمەتتىك، بيزنەس جانە عىلىمي زەرتتەۋلەر جۇرگىزۋدەگى 12 جىلدىق تاجىريبەسى بار، 50-دەن اسا ايماقتىق، رەسپۋبليكالىق جانە حالىقارالىق اۋقىمداعى جوبالاردىڭ اۆتورى، الەۋمەتتىك پسيحولوگيا جانە زەرتتەۋ ءادىسناماسى بويىنشا جاتتىقتىرۋشى ءىلياس تىلەۋبەرگەنوۆ جۇرگىزۋدە.
ەكى كۇندىك ءمودۋلدىڭ العاشقى كۇنى ءىلياس تىلەۋبەرگەنوۆ «مەملەكەتتىڭ يدەولوگيالىق جۇمىستارى: ايماقتاردا ىسكە اسىرۋ جولدارى» تاقىرىبىندا ءسوز الىپ، يدەولوگيانىڭ ماڭىزدىلىعى، قوعامدىق سانا مەن قۇندىلىقتارعا اسەرى، يدەولوگيالىق جۇمىستاردى قاراجاتسىز وتكىزۋ، يدەولوگيالىق جۇمىستىڭ تيىمدىلىگىن باعالاۋ مەن مونيتورينگ جاساۋدىڭ تاسىلدەرى بويىنشا كەڭىنەن اڭگىمەلەدى.
ايتا كەتەيىك، سەمينار سوڭىندا قاتىسۋشىلارعا سەرتيفيكاتتار تابىستالدى دەپ جوسپارلانعان.
جالپى، «Ruh camp» كوشپەلى وقىتۋ سەمينارلارى وسىعان دەيىن 24-25 تامىز كۇندەرى كوكشەتاۋ، 7-8 قىركۇيەك كۇندەرى اقتوبە قالالارىندا وتكەن. بيىلعى جىلدىڭ 5-6 قازان كۇندەرى الماتى، 13-14 قازان استانا قالالارىندا جالعاسادى.
